حدش عايز اعمله بلوفر يا جماعة

-


ذكرياتي 65
زمان كانت الامهات لازم تعلم بناتها الاشغال اليدوية و دي شطارة ومنها التريكو و الكروشيه و الخياطة وغيرها
انا ماما كانت شاطرة جدا في الاشغال اليدوية بحقيقي و شاطرة في حاجات كتير تعقد وانا مكنتش اتعلمتها على اعتبار ان ماما اعتبرت ان المدرسة حتقوم بالواجب ولم يحدث
في يوم من ذات الايام اللي اتفتح فيها ماسبيرو و بقى فيه تليفزيون وكانت مسلسلات ساذجة جدا ولكن مؤثرة و بالذات اللي كان فيها عبد الله غيث بيمثل عبيط القرية و في نفس الوقت شاكين انه مجرم و لكن المجرم في النهاية يطلع حسين رياض ، المهم ان ماما قررت في تلك الايام اني لازم اتعلم تريكو وده لأن مرة وهي بتشتغل سألتها عن معنى الغرزة و يعني ايه غرزة تحت و غرزة فوق و فتحت بذلك على نفسي باب التعليم
ماما طبعا استحالة تديني اتعلم بابرة تريكو وانا عندي اتنين فراودة صبيان ممكن اي واحد فيهم ياخد الابرة و يعمل بيها فارس و يحارب و يغز والله اعلم بقى حيغز فين
دخلت ماما الاوضة ومعاها مسمارين طواااال جدا و شلة صوف و احنا بنتفرج على حلقة مهمة جدا بيخطف فيها حسين رياض الناس و يعذبهم و خصوصا ان حسين رياض كان مثال الطيبة عندي وانا كنت باحبه و بصيت لي ماما و قالت لي:
خذي الصوف و ابتدي
نعم !!!!
ابتدي ايه بالضبط
ابتدي التريكو
فين
على المسامير
نعم
صحيح ايدي كانت صغيرة و المسامير طويلة ، تقريبا طول ابرة الكروشيه لكن
ليه انا مش عايزة
و ده مش اوبشن ، مش وارد ان انا مش عايزة
ما داهية لابقى بنت ما بتعرفش تريكو
لا خذي و ابتدي
وعين على المسامير و عين على التليفزيون الابيض و الاسود ال14 بوصة الفخيم اللي الناس بتحسدنا عليه
و ابتدي
طيب ابتدي ايه
و الف الخيط و اعمل دواير و حسين رياض يمسك الكرباج و يضرب وانا طبعا مش مركزة في التريكو ده خااالص ، يعني اسيب الناس تضرب و العب تريكو
المهم ان المسامير طخينة والصوف رفيع وانا باشد الخيط و بعد دورين لقيت الخيط متربس ولا يمكن اقدر ادخل المسمار فيه
و خلصت التمثيلية و لكن ماما و العند التركي بقى و لازم تتعلمي تريكو
و انتهى الموضوع ان انا باكره التريكو و باحب الكروشيه لاني اتعلمت الكروشيه في يوم ما كانش فيه تمثيليات و كنا بالليل و انا كائن ليلي اساسا ، فكنت في قمة نشاطي الذهني
انا حاليا حليت عقدة التريكو و قعدت مرة ماسكة ابر التريكو حوالي اسبوع متواصل (والله مش كذب حتى اسألوا بنتي) اسبوع متواصل باشتغل تريكو و عملت لبنتي شال كبييير
محدش عايز اعمله بلوفر يا جماعة
قلبكوا ابيض و لا بمليون جنيه
(لو مليون جايز افكر)

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد