انا حافهمها لوحدي

ذكرياتي 54
كنت من اوائل فصلي في الثانوي و مش علشان عبقرية و لكن علشان الفصل ميح ، انا كنت في طرابلس ليبيا و كانت معايا صاحبتي من الأوائل و شاطرة و كنا عاملين زي الأهلي و الزمالك ولكن كان والدها له منصب كبير في التربية و التعليم و لذلك و لما كان المدرس المصري يشعر باي تهديد من ناحيتي و بالذات لأني في الرياضيات كنت ممتازة و هي بقى في المواد التانية جبارة و لكن فيه نوع من المنافسة , و المدرس المصري مش عايز كدة ، هو عايزها الأولى و خلاص وفي النهاية كانوا يروحوا عاملين لي فصل ما تكونش هي فيه وأغلبه ميح علشان ما ازعلش لانه كان بيبقى مدرسينه تعبانين و يحطوني فيه زي ما بيعملوا مع الزمالك برضة.
المهم ان المدرس بتاعنا بتاع الرياضيات (math) كان بيجري في المنهج و كل مرة يدينا درس انقح من اللي قبله وبالنسبة لزمايلي بيجري جامد لذلك طلبوا مني الاولاد في الفصل ان انا اساله سؤال في نصف الحصة يرد عليه و اساله تاني و يرد لغاية لما تخلص الحصة و يبقى ناخد نصف الدرس و ما كدبتش خبر و هات يا اسئلة و هو مش مصدق ان انا مش فاهمة لاني كنت امله الوحيد ان انا اللي فيهم وان انا الاثبات الوحيد انه بيعرف يشرح وفي نهاية الدرس لقيته بيقول لي تعالي معايا اكملك الاجابة و اشرح لك اللي مش فاهماه في الفسحة
هه في الفسحة ، ده ما كانش الاتفاق ، الحصة آه لكن الفسحة تروح علي كلا و الف كلا
انا بقى عايزة اجري كالعادة والفسحة كدة حتضيع مني وده بالنسبة لي مستحيل و لقيتني باقول له
مش مهم
انا حافهمها لوحدي
و ده ما عجبوش الرد و راح مفتوح في الزعيق
انت فاكرة نفسك ميييييين ..... انت حتة تلمييييييييذة لا رااااااااااحت ولا جااااااااااااات
انا مخلص الجاااااااامعة انا بافهم اكتر ميييييييييييينك
انا ما كنتش فاهمة الثورة دي ليه
وفي النهاية بص للاولاد و قال لهم
يا انا يا هي في الفصل
و كلهم قالوا
انت يا فندم
الاندال
المهم اول ما يدخل يشاور لي برة
انا اطلع طلوع الانجليز من اسكندرية و بدل ما اقف قدام الفصل علشان برستيجي على اعتبار اني من الأوائل طول عمري ، مرة اروح الحمام و اقعد فيه طول الحصة علشان برستيجي ما يسمحش ان انا ابقى متذنبة وواقفة قدام الفصل زي الخايبين
والمرة اللي بعديها الف على فصول المدرسة كلها اطلب اصحابي ، قال ايه علشان عايزين تدريب فريق البينج بونج علشان البطولة و لا هم في الفريق ولا فيه بطولة من اصله
ومرة ادخل الفصل اللي جنبي وعندهم رياضة فابدل اماكن كل الشنط
و في الآخر انا رحت جبت بلاستر و حطيته على بقي وهو ضحك وصعبت عليه و صالحني و بطلت اسأل في الحصص بتاعته خااااااااالص نهائي ابدي ابسلوتلي