شبشب الهنا ياريتني كنت انا

-


حاضطر البس شبشب
ذكرياتي 67
عندي مشكلة كبيرة في المشي ، طول عمري ما احبش امشي ، اجري آه ، ألعب آه ، انما امشي ، لما ماما كانت تقول لي ياللا نخرج ، على طول اسألها فين لان لو نازلين نمشي يبقى بلاش و لو أصرت يبقى عياط بقى علشان مش باحب امشي خالص .
لما دخلت الكلية و معايا العربية كان عندنا جراج قدام البيت على طول في طريق الحرية لكن لما شفنا حوادث كثيرة قدامنا ايام لما كان الناس ممكن تجيب الرابع في طريق الحرية (مش زمان قوي من ثلاثين سنة بس) ، كانت الحوادث دي خلتنا نغير الجراج و نروح لواحد بينه وبين البيت بتاع دقيقة مشي
والله العظيم دقيقة تصوروا ، ده كتير ، انا مش بتاعة المجهود ده حرام عليهم ، المهم كنت باتحايل على اخويا يروح يجيب عربيته و يعدي علي علشان يوصلني الجراج ، لكن المشكلة انه مش كل يوم بننزل في نفس الساعة و مش كل يوم غزالته رايقة وبالتالي اضطريت آسفة اني امشي للجراج
دلوقتي مشكلتي بقى في الجزمة بتاعة المشي للجراج لان كان زمان بنلبس الجزمة 11 سم و 7 سم و لما اكون عملية تبقى 5 سم وكل مرة اتكعبل في جزمتي لان الشارع مليان حفر و غيره وبالتالي قررت و عزمت على اني البس الجزم اللي على الارض و بطلت العياقة في تلك الناحية المهم اني ما اقعش في نص الشارع و ميت ايد تشيلني و اسم الله علي وحاجت تكسف كدة
المشكلة بقى في الاجزمة البيج اللي باروح بيها الملجأ كل اسبوع مرتين لانها لازم تكون مريحة و واسعة وعلى الارض وكل مواصفات الجزم بتاعة الرياضيين و في نفس الوقت تناسب واحدة عدت الخمسين
جبت جزمة تجنن ومريحاني ومن البرتغال باين واللا البرازيل المهم انها مريحة وعلى الارض وواسعة وشكلها يناسب سني وكله تمام إلا الريحة اللي بتطلعها لما اقلعها
اف
باضطر اقلعها في الحمام لغاية لما اقدر ادخلها لدولاب الجزم
وامبارح جوزي قال لي :
على فكرة الحمام ريحته مكمكمة والظاهر ان الميه سايبة اثر في طقم الارض والا يمكن الشغالة بتمسح الارض بخيشة معطنة و انا باسمع وكل اهتمام و قلت له
انا حاتصرف في الموضوع ده و حارتب مع الشغالة موضوع ريحة الحمام ده
وخرجت من الاودة وانا بمنتهى الجدية و طلعت برة وانا باقول
الحمدلله ماجابش سيرة الجزمة
طبعا شيلت الجزمة و قلت له انا اتصرف و تاكد ان الشغالة بعد كدة مش حتسيب الريحة قصي مش حتتسبب في الريحة دي تاني
مش عارفة احط الجزمة فين
على السلم يمكن تطفش القطط اللي مستقصداني والا بعدين تطفش الضيوف
على السطوح جنب الديش علشان محدش يسرق محطات حد
المهم اني مش لاقية جزمة مريحة زيها و المحل اللي كنت باجيب منه قفل
حاضطر البس شبشب بقى والا ايه

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد