زيادة سادة والا على الريحة
ذكريات 68
ايام زمان مكانش فيه قيود على الزيارات ، على الاقل مش زي ما انا شايفة دلوقتي !!
او بالاخص والدي مكانش عنده القيود دي .
كان وهو جاي الظهر و طالع على سلم البيت يشاور لمامتي بايده عدد الاشخاص اللي طالعين معاه وماما من سكات تروح على المطبخ و تحضر للعدد اللي قاله غذاء فاخر وكانت الله يرحمها و يرحمه محترفة مش زي ستات الايام دي.
السلطات و انواع الاكل تكون مترتبة و عارفة مزاج الناس و الاكل دايما على مزاجهم
ده طبعا كان مصاحبه شغالتين واحدة للسوق وواحدة للاولاد و مفيش مانع اللي بتنظف و غيره ولكن المهم الضيوف مسموح بيهم و بالعدد اللي بيشاور بيه والدي كل يوم
لما كبرنا و دخلنا في اللعبة و بعد ما بقت الشغالات اللي بتيجي من البلد شبه معدومة في السبعينيات ، كان بابا مصر انه يجيب ضيوف ولا كأن فيه أزمه.
أما انا باعتباري بنت و باعتباري واحدة من العيلة فكنت من ضمن اللي عليهم الضيافة و بالاخص البنت الصغيره.
في مرة بابا ناداني و قال لي :
شوفي انكل يشرب ايه
بصيت لقيت حوالي 7 انكل
و كل واحد له نوع قهوة مختلفة
ايشي سادة و ايشي على الريحة و ايشي زيادة و انا اساسا مش من بتوع القهوة ، يعني اخري الشاي و قلت حاضر
دخلت المطبخ جبت حلة صغيرة و اديها بن و سكر كله في مرة واحدة
ده انا نسيت مين قال ايه من فبل ماوصل المطبخ
صبيت الفناجين و في الصينية وكل واحد بطبقه و آخر شياكة و كبيت القهوة في الفناجين و طلعت بصينية كبيرة ماليانة قهوة ووصلت بصعوبة .
وقفت قدام أول واحد و شاورت له بدقني على فنجان معين ، ده يا انكل
ولما يحط ايده على واحد تاني اقول له : لا لا اللي جنبه
وبالتالي اقتنع الكل ان القهوة معمولة له مخصوص
اما بالنسبة للسكر فاكيد كل واحد افتكر اني متلخبطة و مش كل واحد حيدوق بتاع التاني
خلصت الزيارة و سلمت عليهم وهم ماشيين بابتسامة برييئة و انا عارفة ان مزاجهم اتلخبط
بس المهم محدش ماشي زعلان
مامتي ماعرفتش الموضوع ده الا بعد ما اتجوزت بسنين و الا كانت ليلتي مش حتفوت
هو فيه كدة ، ضيوف و نعاملهم بالشكل ده
الله يرحم الزمن الجميل
تعليقات
إرسال تعليق