بلدي .. بيئة .. والا ياااي متحضر

ذكرياتي 86

كبرت ودخلت الكلية وانا في عز شبابي وكان ايامها اللي يلبس ايشارب يبقى بلدي ، كان يطلق عليه بلدي وانا الصراحة مكنتش فاهمة الربط ما بين البلدي والشعور بالقرف الشديد من الهيئة يعني مش فلاح مثلا فيبقى بيلبس مختلف ، لا بلدي ، وياريت ، ده كمان لازم  قبلها ياي ... بلدي

طب مانا في بلدي والصراحة بعد الجلوس الهادئ الصامت في طرابلس الغرب في ليبيا حيث مخالطة الايطاليين والتعرف على الطريقة التي يتعاملون بها بعضهم البعض وان كانت فيها الصوت العالي ولكن ترى فيهم التحضر في التعامل مهما كان مستوى ما يعمله فالسائق مهذب مثل المهندس ، كلاهما محترم

لما جيت مصر صدمت حضاريا

بالشتيمة ودي كانت اول حاجة ، وسمعت الفاظ كلها تختص بامي ولم اعرف ما هو التار البايت بين امي وكل ما هو عربجي

لقيت العربجي يجر الحصان و يتف على الشارع ولم اعلم السبب الذي يمنعه من حمل منديل مثلا او الانتظار للتف في الحوض لما يروح

لقيت ان الناس ممكن رجليها تبقى متوسخة قوي قوي

وجيت في اسكندرية لقيت ان جارتي يونانية او اجريجية زي ما بيقولوا والبقال اجريجي لكن المصري عايش في احسن حتت وفي اوحش حتت لان في طرابلس في الخمسينيات كان الليبيون يعيشون خارج المدن في الصحراء والمدن سكنها الايطاليون

لقيت الوساخة شديدة والناس زحمة و كتير

لقيت الحلفان كتير واتعلمت احلف  بس علشان اللي قدامي يصدقني

لقيت الضحك طول النهار في الحلو والمر

اتعلمت اقول نكت

اتعلمت اقول والنبي

اتعلمت العب مع ناس ما اعرفهاش في الشارع بالبسكلتة ونتصاحب

واتعلمت حاجة وحشة قوي ودي كانت اوحش حاجة عندي

اتعلمت ان المدرس مش نبي ولا معصوم من الخطـأ

ودي كانت صدمتي ان الاقي المدرس اجتماعيا مستواه دون مستوى التلاميذ وانه ممكن يضحي بكرامته في سبيل المصلحة

ودي كانت اسوأ ما تعلمت

عرفت معنى كلمة بلدي

يعني شخص على طبيعته لا يهتم بالسلوكيات البسيطة المتحضرة وهذا الشخص البلدي يعيش على طبيعته ويتحدث على طبيعته بمعني ما يعرفش العيب

لكن في وقت الزنقة بينفع لاني لقيت وقتها لما تتزنق في الشارع مش حينجدك الا البلدي

ولو اتسرقت وقتها وقلت حرامي تلاقي عشرين واحد بيجروا علشان يمسكوه من قفاه علشان ما يهربش منك

ولو اتسرقت في مواصلات عامة واتمسك الحرامي يبقى نهار ابوه اسود لان كل الناس حتديله بالقفا لما قفاه يورم

عرفت ان البلدي هو الانسان المصري الغير متمثل بالاجانب والذي يرتدي جلباب والسيدة ترتدي ملابس لا تليق بالمكان ولا الزمان

وطبعا لما التليفزيون دخل مصر وشفنا الافلام الابيض والاسود والممثلين يقولك البلدي يوكل واحنا بلدي بس عندنا كرامة

عرفت ليه كانوا بيقولوا عليه بلدي

اما الايام دي فكلمة بلدي تبدلت وبقت بيئااااا بيئه بيييييءءءاااا

دي بقى مش معناها التغير البيئي من ناحية

Environment

لا ده مرتبطة بالسلوك الغير حضاري واعتقد ان احنا في سبيلنا بعد الثورة نعرف ان البيئة ده هو والمتحضر وقفوا الاتنين قدام الطوب اللي بيتحدف عليهم والبيئة بقى هو اللي بياخد الطوب يدافع بيه عن اليااااي متحضر