هل البطولة زائفة

-

هل البطولة زائفة
ذكرياتي 92

انا كنت باحاول اعمل نفسي شجاعة في اوقات كتير وساعات كانت بتيجي معايا واكتشفت ان الشجاعة والمواجهة مش بطالة
مثلا وانا طفلة في ليبيا وعلى الرغم من اننا 4 اخوة واخوات لكن مامتي حبيبتي مش بتحب تطلب من حد يعمل لها حاجة غيري وكانت دايما تبعتني اجيب الطلبات من الشارع
كلنا متفقين على ان انا الناصحة الجدعة اللي بتفهم ولكن اعتقد انها كانت بتبعتني علشان انا اللي مش باعترض ولا اقف في وش المدفع اللي هو مش مامتي حاشا لله
كان السوق بينا وبينه حوالي 5 دقائق مشي على الرجلين
خمس دقائق بتوقيت البشر ومليون سنة بتوقيتي لان لازم كنت اعدي على كام حقل ألغام ، مش من اللي بتفرقع ولكن من اللي مليانة عيال ليبيين بيكرهوا الطلاينة ولاني ملونة وشعري فاتح فطبيعي اميل للطلاينة عن العرب ومش حاقولك كمية الكره اللي كنت بالاقيها في الشارع
وكل مرة اغير الشارع علشان ما اقابلش حد من العيال اللي بتشد شعري وتضربني
لكن في مرة قلت المواجهة افضل
هي موتة والا اكتر
ومشيت في اقرب طريق يوصلني ولقيت حوالي عشرين واحد واقفين في حالة استعداد وعاملين حرف V و في قمة الحرف الريس الكبير بتاعهم
وبالتصوير البطيء كوكا تسير بين الاطفال يمين ويسار ومعها موسيقى تصويرية من بتاعة الكاوبوي
وتصل كوكا الى اول طفل على قمة الهرم
وترفع يدها وتضربه بالقلم على وجهه
والله ما اعرف انا ايه اللي عملته ده والا ازاي
المهم صمت رهيب
وصوت عصفورة بتصوت علي فوق في السما
وغمضت عليني علشان استنى القلم اللي حيرد علي بيه
اخذت القلم وفضلت بصَّاله وانا بابرَّق
وعايزة اقولكم انا كنت بابرَّق من الخوف هو افتكرني بابرقله من الشجاعة حاشا لله
المهم كملت وسيبتهم لان محدش اتحرك من مكانه
الاتنين الرؤساء انا و الزعيم بتاعهم تبادلنا الاقلام على الوجوه وخلاص محدش من الرعية يتكلم
لا هو قال لهم حاجة ولا انا كملت ضرب
مشيت لغاية السوق ورجعت طبعا طبعا طبعا طبعا  من ابعد شارع فيكي يا طرابلس ، بس المهم ما اعديش عليهم تاني
قلمين على الوش كتير برضه
اهم شيء في الموضوع ان اليوم التاني مامتي بعتتني ارجع حاجة اشتريتها من محل في شارع اسمه عمر المختار
وهو بعيد عن بيتنا ولكن مفيهوش ليبيين كله طلاينة
وانا مشيت علشان اروح للشارع ده واتاريهم جمعوا واعدوا لي العدة بتاع خمسين ولد من اللي حارقهم الاستعمار وانا والله لا استعمار ولا نيلة ده انا حتة بنت مصرية جبانة عاملة فيها جدعة
فضلوا ولاد الذين يتنقلوا من شارع لشارع راصديني لغاية لما قربت من شارع جانبي في عمر المختار وهوباااااااا
فين يوجعك يا كوكا
شعر ماشي كتف ماشي مقص حرامية ماشي والناس الجبناء اللي ماشيين في الشارع سايبين العيال تضرب في وكله يبص بعيد ويصفر
اه لو كنت في مصر والله ما كانوا حيسيبوهم ده كانوا افتكروني حرامية ومش بعيد يقعدوا علي يفطسوني
احنا في مصر نضرب الاول وبعدين نسأل
كله ضرب من غير شتيمة ولاد الايه لغاية لما ربنا بعتلي واحد راجل زعق فيهم راحوا سابوني
أما انا بمنتهى الكرامة ظبطت شعري وهدومي ورحت للمكان اللي ماما عايزاه
هي موته والا اكتر
ورجعت ومن يومها الصراحة بطلت موضوع المواجهات المباشرة تماما ابسلوتلي قطعيا
بقيت بحب الشتيمة احسن من الضرب هي على الاقل مش بتلزق

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد