ماذا ستسمي ابنك ، شحات ، الوحش ، ام كوهينور

ذكرياتي 89

الاسم نعمة او نقمة

كنا زمان ايام الخوف من الحسد الناس تسمي اولادها اسماء وحشة علشان تحفظه ومن ضمن الاسماء اسماء حيوانات او الشحات وغيرها والرسول طلب مننا نحسن من اسماء الاولاد لانها لازقة فيهم طول حياتهم

وانا اسمي لزق في وهو كوهينور

بابايا سمهولي مش علشان خايف علي من الحسد ولكن لانه مثقف وقرأ عن اشهر ماسة في العالم واسمها كوهينور وهي في بريطانيا في مجوهرات التاج كالعادة سرقتها بريطانيا من الهند اللي كانت سارقاها من باكستان اللي كانت سارقها من بلوشستان اللي موت الناس بعضهم عليها زمن طويل

المهم مش حادخلكم في تاريخي الدموي الاحمر الاسود اللي ممكن تشوفوه على الانترنت في اليوتيوب وتكرهوا اليوم اللي اتعملت فيه الماسة دي

لكن الاسم معناه جبل النور

واو

اسم يجنن والاهم ان بابايا سمانا جبل النور ومكانش موجود يوم ما اتولدت كان سافر وهو مش عارف ان مامتي حامل من اصله

ومامتي معرفتش انها حامل الا بعد 5 شهور لما بدأت اتحرك وهي مش مصدقه ان ده حمل لانها كانت طبيعي بتحمل بصعوبة

ولكنني زي النسمة وبالتالي ما تعبتهمش خالص الحمل زي الفل 4 شهور بس والولادة زي الفل من غير الم ولا تعب وكله زي الفل

والاسم

خدوا دي

كوهينور

وبدأت الحياة بان كل مرة حد يسألك اسمك ايه تقول له كوهينور يعيد السؤوال اسمك ايه

الله !!،  ما قلنا كوهينور

والدلع كوكا خلي بالكم جامد على الشده اللي على الكاف التانية مش كوكا زي كوكا عبده بتاعة عنتر والنبي ما باحبش اسم كوكا من غير شدة وعلشان كدة باحطه دايم باتنين سي ورا بعض في الانجليزي

وليه سي مش كيه

لان الدلع ده طلياني نتيجة ان اللي كانت بتربيني وانا صغيرة واحدة طليانية جارة مامتي وكانت مش بتخلف وحلفت عليها هي اللي تاخد بالها مني وتربيني وتعمل لي فساتين وتدلع في ومامتي برضه ثواب ما رضيتش تزعل الست فالدلع طلياني والاسم فارسي والعملية مش مصري من اصله

وتيجي في مصر وكل ما حد يسألك اسمك ايه

كوهينور

اسمك ايه

الله!! ،  ما قلنا كوهينور ومحدش يكرر وراك لان اكيد حيقولها

كيهي نور

لا كوهو نور

لا كاهي نور

لا كيينور

لا كنور

المهم ان انا كنت مبسوطة من الموضوع ده لان كان بيخليني محط اهتمام في المطار الضابط يمسك الباسبورتات بتاعة العيلة كلها ولما يجي على اسمي يقول لمامتي فين صاحبة الاسم الجميل ده وانا اطلع من ورا مامتي وابصله في الشباك وانا طفلة علشان يعاكسني وابصله وانا شابه فمايرضاش يعاكسني

وفي كل مكان الاسم يتطوع على المكان زي مثلا لما رجلي اتكسرت فكنت في المستشفى فينادوا ويقولوا فين كحي نور فانا اكح واقول انا

وكنت مسئولة عن برامج بطولة العالم في الكاراتيه للشباب ولما استنوني علشان نروح البطولة نادوا علي فين  كوري نور ما الناس جاية من اسيا والكوريين كتير

اللي بقى مش مخليني مبسوطة ان اولادي مش راضيين يسموا حد من الاحفاد كوهينور

اول ما تقول لهم يقولوااااااااااااا   لااااااااااااا

كفاية علينا واحدة كوهينور في العيلة

يعني انا بس اللي ادبس

واخر نكتة كان اخويا بيعاكسني دايما ويقول لي انتي من اصل يهودي

اصل اسمك كوهين ولزقت فيها نور بقيتي كوهيننور

ويروح ضاحك ضحكة خنفة زي يهود الافلام القديمة

انا دلوقتي اتصالحت مع اسمي خلاص ، وما بقاش يفرق النطق وخصوصا ان دلوقتي معظم حياتي مع الانترنت اللي مش بتسمع فيها بس بتشوف يعني محدش حينطق اسمك من اصله هو حبكتبه ولو كتبه غلط تقول مش بيعرف المفاتيح كويس وخلاص