صيام الجيش الثالث كله ضروري في الحرب

ذكرياتي 91

الايام تمر امامي زي شريط الفيديو مع هيد ممسوح وساعات الصورة بتبقى واضحة و الصوت واضح وساعات تسمع الصوت مع صورة مشوشة ولكن اقولكم ان الصيام في غير ايام رمضان بيبقى زي اللي بيلبس لبس جديد في يوم عادي ومحدش واخد باله ان كل اللي انت لابسة من اول الشراب تحت لغاية التوكة اللي في شعرك جديد في جديد وان المفروض ان اللبس ده علامة على الفرحة وللاسف محدش بياخد باله والصيام عامل كدة زي الفرحة لما بيبقى في رمضان بتبقى فرحان انك مش بتاكل وفي الايام العادية بتبقى تعبان علشان مش بتاكل

انا مرة تهورت تهور غير عادي ولكن على قد الحدث

كنا في اكتوبر 73 وكنت انا واخويا لوحدنا في مصر وكل عائلتي مش معايا والحرب تعني الحرب يعني مع خيالي الواسع تعني ان فيه طيارات حتيجي تدك البلد خصوصا ان في حرب الاستنزاف كان ممكن يكون فيه غارات والسادات قال العمق بالعمق ومدرسة بحر البقر كانت في العمق و اتضربت

يعني ممكن ميكونش فيه اكل و شرب ولازم تجيب تموين شهر لقدام لما الميناء تتقفل ومفيش اكل ييجي وده احنا عاصرناه في سبتمبر 69 في ثورة ليبيا لما الميناء اتقفلت كام يوم كل حاجة نقصت لان ليبيا تقريبا اكلها كله بيستورد من برة

لكن عمار يا مصر مفيش نقص في حاجة لان في مصر فيه حاجة اسمها الدلالة وهي سيدة محترمة عادة تكون ام واحد من الشباب وتسمى باسمه

ام محمد ام خميس ام بتاع المهم انها ام وفيهم ستات ما خلفتش بس مش هي دي مشكلتنا دلوقتي

الدلالة كانت تجيب الارز و السكر وكل ما تشتهيه الانفس وتدفعك على البضاعة الضعف بس تجيلك ساعة ما يقولولك البلد ما فيهاش والشباب بتاع اليومين دول ما يعرفهاش وما يعرفش ان مصر حلالة العقد ومفيهاش حد بيموت من الجوع

الحرب قامت وانا كنت في الحرب اللي في قبلها 67 في ليبيا وكنا برضه بنحوش الاكل علشان لو الميناء اتقفلت وحركات كلها تقلق

لما قامت حرب 73 وقفت الكليات وانا كنت في اول سنة يعني كان نفسي تفتح على عكس السنوات اللي بعدها مكانش حيزعلني ان الكلية مقفولة

كل يوم نسمع الاخبار ونعرف اللي بيحصل وعلى عكس 67 اللي كل يوم يقولوا طيارة وقعت وطيارة طلعت وكله في الفتش ، الحرب دي كان الريس مصر الاخبار توصل بالسليم وبالتالي بنسمع عن شهداء وكلام من ده و الدبابات تعبر ومش عارفة مين اللي في الجيش المصري اللي ضرب كام دبابة وانا فخورة ببلدي وسعيدة بيها جدا

وجاء اليوم ...........

طام ططام ....... موسيقى رعب وهتشكوك يظهر على الشاشة

الثغرة

نعم ... وات .. مش فاهمة

الثغرة يعني الخرم ، اسرائيل خرمتنا و طلعت من ورا الجيش الثالث الميداني ومحاوطاه

يا لهوي ي ي ي ي

الفيلم العربي اشتغل في دماغي

لا انا اسفة الفيلم الهندي اشتغل في دماغي

الاسرائيليين جايين اسكندرية وحنشترك في الحرب

والسويس اللي كانوا بيحكوا عنها ازاي وقفت ايام الحروب والمقاومة الشعبية

ده انا لازم اتطوع للهلال الاحمر

بس مش هي دي قصتنا ـ حاقولكم على الهلال الاحمر بعد كدة

انا قعدت ادعي ادعي ادعي ان محدش يتقتل من الجيش الثالث وقالولنا فيه مليون ونصف وانا اتخيل مليون ونصف عائلة يموت فيها شهيد

الله

ده كدة ناس كتير ورحت توجهت الي الله بخشوع شديد وقلتله يااااااااارب

ياااااارب لو الموضوع بتاع الثغرة انتهي من غير ما يموتوا حاصوم 60 يوم

وفضلت كل يوم اسمع ايه اللي بيحصل في الجبهة  لغاية لما اوقفوا اطلاق النار

الحمد لله مفيش ناس كتير ماتت و الجيش الثالث سليم والحمد لله

اوباااااااااا

ستين يوم

اوبااااااااا

انا ا تدبست والا ايه يارجالة

طب كنت خليتهم اسبوعين

طب كنت خليتهم فلوس وبابايا يدفعهم

انما ستين يوم

مش حاقولكم فرحتي قد ايه بالنصر ولكن كنا لسة طالعين من رمضان

مش معقول حاصوم على طول كدة

واصبري يا كوكا بتاع 5 سنين على ما الموضوع يختمر وتقرري الصيام

اصوم يوم وانسى يوم وارجع اقول انا صمت كام يوم وانا صمت والا لأ واتسحر واقوم افطر تاني يوم عادي وافتكر الظهر اني كان لازم اصوم

في النهاية ولما اشتغلت واتجوزت وخلفت ولاد شالتني وبلاد حطتني ولو سألتوني صمتي كام يوم اقولك باين اسبوع من الشهرين

لا يمكن 10 ايام

تفتق ذهني اني ادفع فلوس بدل الصيام

ورحت جايبة بطاطين وغطيان ووزعت في الشتاء على كام واحد قالولي عايزين بطاطين

وتفوت الايام ويقولولي لا مفيش حاجة اسمها كفارة الصيام بطاطين لازم اكل

وتفوت الايام وادفع فلوس لستين وجبة لستين واحد ياكلوا علشان الكفارة

وتعدي الايام واقابل الله يرحمه الشيخ عبدالله شحاته ويقول

مفيش كفارة للنذر ، اوفوا النذور

يانهار ملون

ستين يوم

قررت بعديها وكنا في التسعينات ان اعمل نوتة الجيش الثالث الميداني واكتب فيها الايام اللي باصومها وبدأتها من الصفر

تفتح النوتة تلاقي باقي 60 يوم

باقي 59 يوم

باقي 58 يوم

وفضلت ورا النوتة لغاية لما خلصت النذر ولولوولولولييييي

وسنتها كان فيه احتفال للجيش الثالث الميداني في اسكندرية

كنت عايزة اقابل اللواء واقوله ان من العساكر بتوعكم انتم لازم تضموني للاحتفال والا ايه

هل انت موافق على انني من الجيش الثالث الميداني

لو الاجابة بلا اقفل المدونة مش عايزين منك حاجة وروح بينادوا عليك جوه