الزمان ، الزبيب مش بيكسر الصيام

ذكرياتي 93

الزبيب مش بيكسر الصيام على فكرة

رمضان طول عمره كان له رونقه وله حب في قلوب الاطفال لان ايامنا كانت الفوانيس بتنور بالشموع وطبعا مش حاقولك الايد لازم تكون طويلة علشان الشمعة كانت بتلعلع وايدينا تتلسع بس مبسوطين وحالو يا حالو ونطفي النور ونغني زي الاطفال الابرياء اللي ما بشوفش زيهم الايام دي

والله احنا كنا بجد احباب الله وما زلنا احباب الله بالمقارنة باطفال الايام دي

واول ما والدتي علمتنا الصيام كانت بتقول صومي صيام الحاجة لما تجوع تتغدي والا صيام الفار لما يجوع يروح الدار

وطبعا على الظهر كنا نصوم صيام الحاجة ولكن اخويا الصغير افتكس طريقة جميلة قوي للصيام وهي ان عنده حفنة من الزبيب وكل ما ياكل يحبس بزبيب ويقول اللهم اني صمت وكانت جميلة لكن انا مكنتش مصدقاها قوي بس هو جربها ونفعت

وكنا بنصوم في الشتاء في بدايات الصيام الفرض وكنا بنقعد جنب الدفاية لان الدنيا كانت برد شديد والفطار الساعة الخامسة مساءا ومانساش اني دايما كل مااشوف حاجة قدامي احطها على جنب علشان افطر بيها وتعالوا شوفوا على ترابيزة الفطار جنبي

شكولاتة – جبنة – زيتون – لب – سوداني – كوكاكولا -  .... ياللا كل اللي بتفكروا فيه

ويخلص اليوم وانا مالحقتش اكل اللب

استنى اليوم اللي بعده وانا في اشد الحاجة لاكل اللب لانه طعمه راح مني

وايامنا كان الفوازير في الراديو اول ما المدفع يضرب نحط الراديو ونسمع الفزروة ونتسابق في حلها ونسمع تمثيلية انا فاكرة شادية كانت عندها تمثيلية حزايني اسمها نحن لا نزرع الشوك باين المهم تلاقي الكل بياكل ومحدش بيتكلم كله هس علشان التمثيلية

على ايامنا الكنافة كانت لازم تتعمل على البوتاجاز من فوق مش في الفرن من تحت والا من عند الحلواني عيب

على ايامنا كان المدفع يهز البيت علشان كنا ساكنين في اسكندرية جنب المعسكر الروماني اللي اتقلب عمارات علشان اسرائيل ترضى عنا

على ايامنا كان القطايف تتقلي بالسمنة مش بالزيت ويلعن ابو تصلب الشرايين احنا مش بخلاء

على ايامنا فوازير نيللي كانت فيه فوازير الثلاثي عارفينهم اللي طلع منهم سمير غانم

كنا ممكن نحط ابو فروة على دفاية بالجازولين والله جوه البيت الدفاية بالجازولين وعليها ابوفروة

على ايامنا كنا لو نمنا كتير مامتي تقول لي صيام ايه اللي انتم صايمينه ده

بس بقى فيه حاجة تانية كانت بتحصل ايامنا

كان في النادي الناس اللي فاطرة اكتر من اللي صايمة

كانت الطلبات تنزل على الترابيزات عادي محدش مكسوف من فطاره

كانت التراويح تتعمل في جامع ما في حتة ما ماعرفهاش

كان اللي بيروح التراويح يقولوله انت حتستشيخ

وكان اللي بيجود القرآن يقولوه انت حتعمل فيها فقي

واللي بيصلي في الجامع يا جاسوس يا مخابرات علشان يقفش في الاخوان

وانا بابايا كان سايب البلد من اصله لانه كان بيصلي في الجامع وبيصلي التراويح ومش اخوان

المهم اسيبكم علشان الحق اخذلي شوية زبيب واكل اي حاجة

كل سنة وانتم صايمين