رحت الميدان

الميدان

رحت الميدان علشان اشوف المكان اللي اجتمعت فيه يوتوبيا زي ما الكتاب بيقول

ناس بتحب بعضها من غير ما تعرف بعض

ناس بتدافع عن ناس ولو كانوا من دين تاني وتيار تاني

ناس قاعدة مش عايزة تمشي الا لما بلدها تتحرر من الانغماس في الفردية

فردية الحكم وفردية التفكير حتى فردية العبادة

النظام خلى المصري ما بقاش اجتماعي

قعدنا في البيت مش قادرين نعزم ونتعزم لان الفلوس على قد المصاريف

خلى الشاب اللي مامعوش امله مقطوع ونفسه مقطوع من الجري ورا لقمة العيش

والمصري يقولك رزقك هو اللي يجيلك وهم فوق عمالين ياخدوا من رزق الناس ولا كانهم مقسمين الارزاق والعياذ بالله

والميدان جاء قال لا المصري زي ما هو

اللي بيحصل للمصري دي ازمة وعدت الحمد لله

رحت الميدان وكان نفسي اقعد لكن لا مش لازم اقعد لان البلد مش عايزاني في الميدان

عايزاني اروح اشوف الناس اللي عايزة تتعلم اعلمها

الناس اللي محتاجة اكل اكلها

سبت الميدان مع ان الناس هناك كانت بتبتسم ابتسامة مصرية هادية جميلة

ونفسي اعمل لنفسي ميدان في البيت اعزم فيه كل اصحابي ونقول لبعض

سلمية سلمية وييجي جوزي يضربنا كلنا

ما هو الميدان فيه من ده على ده