اجمل ام في الدنيا

اكيد الواحدة مننا لما تجوز وتخلف بتبقى عايزة تشعر انها اجمل ام في الدنيا والجمال هنا مش بتاع العينين الخضراء والشعر السايح لا ابسلوتلي
الجمال هنا يعني ام الاولاد نفسهم يدوها عنيهم ويفخروا بيها
انا بقى كنت عايزة ابقى هذه الام
اول حاجة عملتها اني ركزت جامد
وركزت اكتر و
في النهاية طلعت ام مختلفة حبتين
يمكن مش جميلة زي ما كنت متخيلة
لكن مختلفة
ازاي بقى يكثر شرحها
مثلا
انا كنت باعيش سنهم سنة بسنة وبالتالي ياما كان جوزي يجي من برة يلاقي الاولاد نايمين على الكنب وانا صاحية اكمل فيلم الكارتون
مثلا مرة ابني واقف يفرجني على حاجة عملها وهي انه حط العنب بين شفايفه واسنانة وبيقول لي بصي وانا حبيت افقعهم بضربه واحدة والنتيجة اني لقيت ابني واقع على الارض من قوة الضربه وبيبص لي ويقول لي
فيه ايه
والعنب لسة زي ما هو ما اتفعصش
شرحتله الموضوع وعدت
مرة مثلا كنا بناكل منجة واتسابقنا للحمام عشان نشوف مين اللي يغسل ايده الاول ولما ابني وصل الاول مسكته من هدومه ومسحت ايدي في وشه بالكامل وهو مندهش وقلتله روح استحمى في الحمام التاني وبكدة اكون انتصرت
كنا بنتخانق على مجلة ميكي مين يقراها الاول وبما اني الام فطبعا كنت انا اللي باقراها واخلصها الاول
والنتيجة ان اصحاب اولادي كانوا بيحبوني ويقولولهم يا بختكم بامكم دي اخر جمال
انما اولادي
مش لازم حد يسألهم لان كل طفل عايز ام واحنا كنا ثلاثة اطفال واب
ومن ضمن الحاجات اللي فاكراها جدا جدا ان بنتي وهي في اعدادي وانا في لحظة صفا باقول لها على فكرة انتي شبهي ونفسي تبقي زيي
البنت صرخت لااااا
اتخضيت وقعدت افكر ايه اللي زعلها قوي كدة
وافتكرت ان في الاعدادي البنات تحب ان مامتها تكون انجلينا جولي وباباها براد بيت لانهم دايما يحبوا المظاهر موت
وانا كنت ما بين جودي فوستر وكريمة مختار يعني بين البينين
طبعا اعتذرت وقلتها تبقى احسن مني لا مؤاخذة
كنت ام مش بتذاكر لاولادها لانها مقتنعة انهم لو ما عرفوش يذاكروا لوحدهم مش حيفلحوا
كنت باسيبهم يناموا في الاجازات ومش باجبرهم ييجوا معايا في اللقاءات العائلية
كانت رحلاتهم مع اصحابهم اكتر من رحلاتهم معانا
الحمد لله
طلعوا زي الفل
بس الامهات اللي كانوا في سني واولادهم معايا مكانوش الصراحة بيحبوني قوي لان كل العيال تروح البيت تقول لهم
هو انتي ليه مش زي طنط كوكا
والست تتكلم صيني على هندي وفي الغالب بتكون شتيمة يعاقب عليها القانون