جمال الخلق وليس الخلقة

كل واحد مننا عايزله اصحاب
عايز حد يحبه ويتصاحب عليه ويبقى معاه على طول
انا طول عمري باغير مدارس
من مدرسة لمدرسة وفي كل مدرسة اخذ شوية وقت لغاية لما اعمل اول صاحبة لي
وهوبا بقى المدرسة كلها اصحابي عشان بافك من الخوف والقلق
مرة رحت مدرسة في ليبيا وكان اول مرة اتكلم مع الليبيات وكانوا بيخلوني اتكلم عشان بافكرهم بفاتن حمامة وبالاخص اني كنت في المدرسة ومعايا واحدة بس مصرية وكانت بتتكلم معاهم بالليبي ولكن انا ماما كانت تقول مش عايزة حد يتكلم الا مصري
وفي مرة قعدت جنبي واحدة بنت كانت في منتهى الجمال زي الاميرات اللي في القصص طول وحلاوة والوان ورقي في الشكل ولكنها كانت عايزة تسألني على حاجات بالمصري
كل الفصل ساكت وهي جنبي وانا انبسطت انها عايزة تصاحبني لانها اجمل بنت بحقيقي بالاضافة لذكاءها يعني كانت الاولى على الفصل قبل ما اكشر انيابي طبعا
قعدت تسألني على الكلمات الابيحة في اللهجة المصرية وهي ما تعرفش ان احنا في بيتنا ما نطلعش العيبة وانا من الاصل ما كنتش اعرفها ولا اعرف معناها من اصله المهم اجتهدت عشان ما ابانش عبيطة وبقيت اقولها اي هجص في اي هبالة
راحت بعد ما عملت صاحبتي وبعد الفسحة دخلت الفصل لقيت البنات هات يا ضحك
وانا مش فاهمة
اتاريها راحت للفصل وقالتلهم على كل الحديث وبالطبع اتكسفت جدا لانهم كرروا الكلام الاهبل اللي كنت باقوله في قاعدة صفا
كرهت البنت عشان خاينة وغدارة لكن الكل افتكر اني غيرانه منها
والله طول ما كنت في المدرسة دي وكلهم فاكرين الموضوع غيره سواء والدتي او مدرساتي وهم ما يعرفوش انها استغلت براءتي ووجودي الجديد في المدرسة وخلتني اقول كلام ابيح والمصيبة انه كذب