النوم سلطان

انك تنام دي مشكلة ومش مشكلة
مش مشكلة لبعض الناس لانهم بيناموا بسرعة وقد تكون مشكلة للي حواليهم لانهم بيعانوا جنبهم من غير ما اللي نام يعرف
ومشكلة للي عنده ارق مزمن
انا مين فيهم
اللي عنده ارق مزمن
يبقى عندي مشكلتين
مشكلتي اني مش باعرف انام ومشكلتي من اللي نايم جنبي
طيب مشكلتي اني مش باعرف انام ودي عارفينها
انما ايه مشكلتي من اللي نايم جنبي
اولا
وانا طفلة صغيرة كانت مشكلتي مثلا اني لازم اسكت عشان اخواتي ناموا
مشكلتي اني دايما باكون ادفا من اللي جنبي وبالتالي اي حد في الشتاء يستنى بتاع ساعة وبعدين يبتدي زي الفامباير يمص الدفاء مني بكل الوسائل ومنها تلاقي اختي مثلا تيجي من ناحيتي في السرير وتقول لي ادخلي جوة كدة
السرير مفتوح من الناحيتين مفيهوش جوه ولكن لا هي تقول لي كدة وتعتمد على ان انا في مود الكسل ولا اناقش فاتنقل للناحية التانية البااااارددددداااااا
مشكلتي مثلا لما كنت انام جنب اي طفل يشلط في ويزقني برجله وايده طول الليل
وكان فيه بعض قرايبي من الاطفال يستنى وانا في عز النوم وده في اصله عزيز يعني ما يجيش بسرعة ويقوم طرااااخ
ضاربني حتة قلم على وشي
والصبح اشتكي للام فتقول لي يمكن كان يوم صعب عليه يمكن متضايق يمكن زعلان
وبالتالي هذا الطفل كان لازم اتأكد من انه مبسوط ومفيش حاجة صعبة عليه قبل ما اتهور وانام جنبه
مشكلتي مع السيدات كبار السن واللي انا منهم دلوقتي هو الشخير
يالهوي ي ي ي ي على الشخير
انا مرة كنت في اجازة وكان البيت اللي نايمة فيه على الاقل ست سيدات من خمسين وطالع
واول ليلة كنت لسة بريئة براءة الغزلان
قعدت سهرانة باتكلم واتسلى مع القرايب وكله اتسرسب ونام ما عدا انا وقررت ادخل انام
سينفونية ياخواتي
اشي خخخ واشي بخخخ واشي بششش واش فووو ومعدية على الحجرات وكل حجرة حسب الاغنية المضلة لديها
ويزيد على كدة اصوات الليل التلقائية من صراصير الليل والضفادع
كله بعد كدة يصحى وانا عيوني كاسات دم
انتي ما نمتيش يا كوكا
ايوة انا ما نمتيش يا كوكا
انا عشان انام لازملي سايلانت موود silent mode
لكن تتكرر المشكلة وكله يتسرسب وانا قاعدة قال ايه باتسلى وتيجي على دماغي
والذ ما في الموضوع ان تاني يوم فيه واحدة من السيدات الفاضلات حلمت بحرامي
وفي عز الليل تنادي على اختها تطمئن عليها : انت كويسة يا فلانة
مش عايزة اقول ان في عز الليل لما واحدة تنادي على اختها غالبا شعر راسك بيقف واصحى الاقي عيوني كاسات دم وشعر راسي قبل السقف بشوية
ثالث يوم تفتكر الاخت الكبيرة وهي في نصف الحلم ان حفيدتها عندها مدرسة تاني يوم فتنادي على حفيدتها فتقول لها اختها احنا في اجازة نصف السنة
رابع يوم قررت انام جنب واحدة مش بتشخر ودخلت بعد ما كله بدأ العزف الانفرادي ورحت لزقت في الست اللي مش بتشخر ونمت وبعد نصف ساعة حسيت انها مش بتتنفس خالص
يالهوي
يعني انا اخترت اللي قررت تفلسع يومها
قمت وقعدت ابص عليها اشوف فيه نفسي والا لأ
وبعد دقيقة راحت واخدة نفس طويييييييل زي الشهقة كدة
شعر راسي وقف برضه مفيش مشكلة
وفضلت ساكتة كمان خمس دقائق ثم شهقة
اتاري المقطوعة بتاعتها كدة
وعلى فكرة انا كنت باهزها كل ما تسكت عشان تاخد النفس بسرعة عشان كنت خايفة عليها
وكل ما تفتح عيونها تبص لي اقولها
نامي يا طنط يا حبيبتي
تاني يوم قالت
انتي ايه اللي جابك جنبي انا طول الليل ما نمتش منك
هاها
قال هي اللي ما نامتش
المهم في الآخر
طبعا اللمة حلوة
والعيلة تجنن
بس ساعة النوم يفضل ان كل واحد يعيش مع نفسه
وجاء اليوم اللي اكتشفت اني انا كمان باشخر
انا آسفة يا قرايبي
مكانش قصدي اتريق والبس فيها
طبعا تعالوا شوفوا اي حد من الشباب اقول له تعالي نام جنبي
هاهاها
كله يجري زي كرة البلياردو ويستخبى في اي خرم