الووووو مين معايا

طبعا مع اتنين اخوات صبيان مش معقول اعيش دور البنت الرقيقة الامورة ومع ذلك كنت باحاول
كان الكبير يتعمد كل يوم لما اصبح عليه
صباح الخير
يرد علي
مين
اقول له انا كوكا
يقول لي كنت فاكرك اخويا
هاها
ده طبعا هو بيضحك فرحان ان انا باتغاظ وانا باضحك من غيطي هـ ا ا ا
واليوم التاني اصبح على اخويا التاني يقول لي نفس الحاجة مين
انا كوكا
ماعرفتكيش اصل صوتك طخين
وفضل موضوع صوتي طخين لما اصحى من النوم حدوتة عندنا وحكاية
وجيت اتخطبت
ايوة اتخطبت على الرغم من صوتي الطخين لما اصحى من النوم وقلت اهو مش حيعرف الموضوع ده الا لما نتجوز واصحى من النوم وساعتها حيكون الفاس وقعت في الراس ومفيش خلعان

وفي مرة من ذات المرات اخذت دور انفلونزا وكنت في السرير
ومن حظي الجميل ان خطيبي بيسأل علي
كلمني في التليفون فماما قالتله  هي في السرير حاشوفهالك

كوكا اصحي كلمني خطيبك
يا نهار ازرق
كدة حيسمعني وانا صاحية من النوم
رحت منحنحة وجبت ارفع طبقة صوت عندي يعني حبل واحد من الحبال الصوتية كلها
واديله
الوووووووو
لقيته مش بيرد
قلت بصوت ارق كمان شوية
الووووو
رد وقال مين معايا
يا دي النيلة ما انا بارفع صوتي اهو
قلتله كوكاااا
قال لي ده انتي بردانه جامد شكلك صوتك رايح
قلتله ابدا انا البرد في معدتي مش في زوري
وفي النص نسيت ارقق صوتي واتكلمت عادي بصوتي اللي متعودة عليه لما اصحى من النوم
راح قايل
الله اهو صوتك رجع كويس
قلتله انت متـأكد من المعلومة دي
اعتبر ان ده وعد
وقلت في نفسي
اشرب بقى انت اللي جبته لنفسك