اللي ما يعوز البيانو تعوزه الكوتشينة

اتعلمت من صغري ان البيانو جزء مهم من التعليم بتاعي
المدرسة اسمها كيتي
تيجي كيتي وتعلمني
وانا اتمرن
ولما يجوا ضيوف
تعالي يا كوكا ورينا الشطارة
طبعا التعليم غير الهواية
انا باتعلم بيانو مش بالعب يعني لما اقول دو والكتاب يقول دو والاستاذ العظيم باخ قال دو
ما ينفعش ساعتها العبها ري ولا مي
قوم بقى اييه
وانا باضرب النوتة احط ايدي بالغلط على ري
واسكت وابص لمامتي
قال يعني مامتي ممكن تفتن وتقول لباخ مثلا اني بابوظ التراث بتاعه
والمقطوعة تقف والمعزوفه تتلخبط
وفي الآخر الناس كلها تعرف اني غلطت
وقعدت والدتي تقنعني ان محدش من اللي قاعدين فاهمين ان النوتة بتاعة باخ فيها دو في الحتة دي وبالتالي من الانسب اني لما اغلط امشي الامور وما افهمش حد اني غلطت واكمل
طبعا مش طبيعتي ومش باقدر واكيد بما اضرب صباع غلط اجز على اسناني وابص لمامتي بصات كلها معاني علشان حلتني اتخابث على اصحابها وافهمهم ان باخ العظيم كان بيلعب غلط
عدت الايام وكرهت كيتي وكرهت البيانو بس لما قامت حرب اكتوبر المجيدة وكنت في اسكندرية لوحدي وماليش فيها اصحاب
قررت العب بيانو تاني بس بحب
حبيت البيانو على كبر
حبيت النوتة الموسيقية
حبيت سوناتات بيتهوفن للبيانو
حبيت شوبان زي اخويا الصغير
حبيت كل المؤلفين وقدرتهم
كنت بالعب بالساعات
واعجبت باكتر نوتة هي ضوء القمر او مون لايت
كنت بالعبها تقريبا كل يوم
وفي مرة جاء لزيارتنا بعد مدة من الانقطاع
اتفضل ولازم تشرب حاجة
هو كان فاكر انه حيشرب عصير او شاي
لكن انا بالعكس مع العصير لازم يشرب معاها سوناتا من بتاعة بيتهوفن
سوناتا ضوء القمر
هاها
عايزة اقولكم انه مش من هواة البيانو من اصله
هو من هواة ام كلثوم وكلمات ام كلثوم وبالتالي ايه موضوع البيانو ده بالنسبة له غالبا مقلق
اللي بيحصل انه انا اعزف وهو يتململ في الكرسي
يتململ وانا اعزف وقال ايه كلها صح مفيش ولا صوبع غلط
في الآخر وانا في عز المعزوفة لقيت قريبنا قام وقف وراح مزعق
اقلبي الصفحة
قال ايه اقلبي الصفحة
يعني كل اللي انا باعمله ده في صفحة واحدة
لكن انا بقالي بتاع اربع صفحات شغالة فوق وتحت
وهو بيقول لي اقلبي الصفحة
هو فاكر ان انا باعيد في نفس الموسيقى يعني بيتهوفن لو سمعه كان اتطرش
انا اسفة هو اطرش
كان اتعمى وبقى اعمى واطرش
من ساعتها اتعلمت حاجة
اللي ما يعوز البيانو العب معاه كوتشينه
حينبسط وما يكرهش البيانو
انما انا مين
غالبا كل قرايبي بيكرهوا البيانو