شقلباظ

الشقلباظ هو الانقلاب على الارض مع لف الجسم بالكامل
ده تعريفة
كل واحد فينا في حياة اتشقلظ واتقلب
انا واحدة منهم فاكراهم كلهم
مرة اتشقلبت لما سمعت صوت رعد جامد وكنا في طرابلس وهناك الجو ابرد شوية من اسكندرية وساعة الرعد هوبا
واحد طويل اخذت فيه الصالة
مرة تانية كنت في السيرك وقاعدة مع اصحابنا المهمين اللي دايما بيجيبولنا لوج او بنوار او كراسي جنب المسرح
وانا قاعدة لا بي ولا علي وهوبا الاقي فيل طالع من وراء الستارة وواخد في وشه وجاي ناحيتي
حسيت ان دي النهاية وحياتي مرت قدام عيوني
وهوبا
لقوني تحت الكرسي ومستنية لما الفيل يرجع وراء الستارة تاني
مرة ثانية
كنت رايحة اعرف اتنين لبعض عشان يتجوزوا
وانا طنط بقى اللي تعرف الاتنين
ودي فلانة وده فلان والحكاية والرواية ولقيت ان انا اللي باتكلم وكله بيسمع قلت عيب امشي وسيبيهم يتعارفوا
عن اذنكم يا اولاد عشان عندي ميعاد وهوباااا
واحد شقلباظ على الارض في الكوفي شوي واديله زحلقة
وكل الكوفي شوي وقف يساعدني اقوم وانا اقولهم انا كويسة المهم سيبيوهم يتعارفوا
ومرة تانية كنت نازلة من بيتنا باقول يا شر اشتر عشان ازعق لمكتب من البريد السريع وهم قعدوا بتاع اربع ايام تأخير على ما يجيبوا الباسبور وكان لازم الحق اخذ فيزا والا حاجة المهم وقاعدة طول السكة احضر الخناقة وانا مش من عادتي اتخانق وبالتالي لازم اكون وصلت لأخري عشان اعرف اقول كلمتين
وصلت للشركة وركنت العربية قدامها
دخلت وهوبااااا
زحلقة لغاية الموظف
ساعدني هو و زملاءه على ما وقفت
صوت رفيع مؤدب
هو لو سمحتم مش كان لازم استلم الباسبور من ثلاث ايام بعد اذنكم
ومرة تانية كنت مخلصة امتحان في كلية الهندسة وعاملة فيه حلو على عكس معظم الدفعة
عملتي ايه يا كوهينور
فله
وانت
ش ش ش
وانتي
ش ش ش
وانتم
ش
ش
ش
طيب اروح انا لان لقيت الموضوع محرج واول سلمة في السلالام قدام المبنى وهوباااااا
شقلباظات لغاية آخر سلمة
الكلية كلها اتلمت وانا عايزة اقوم من سكات
بس سكات مين يا عم
كله حوالي
أما بالنسبة للمرات اللي كنت باقع فيها وانا حامل
لا تعد ولا تحصى لكن على مين انا اتعلمت اني لازم اقع على جنبي وبعيد عن اي مفصل
وبالتالي كنت كل مرة انافس الجول كيبر بتاع الزمالك واقع من غير كسور ولله الحمد
اسم الله عليكم كلكم
اللي يقع على جنبه انا باقولكم عن تجربة مريرة لعشرات المرات