منك لله يا حكمت هانم

تأثير الافلام علينا له ايجابياته وسلبياته
يعني مثلا الافلام الكوميدي بتخلينا نضحك ويعدي علينا الوقت جميل
والافلام الاكشن بنتفرج عليها عشان نشوف عالم تاني غير بتاعنا
اما افلام الدراما فانا من الناس اللي مكانتش بتؤثر في ولا ابكي ولا انحنح ولا اعيط ولا حاجة
زمان ايام التليفزيون الجبس كان يوم الخميس بيكون فيه فيلم عربي من الافلام الكلاسيكية المصرية
اشي صراع في النيل والخطايا وكلام من ده
وانا واحدة من الناس ممكن اقعد افصص الفيلم يعني وانا باتفرج اشوف كام كاميرا بتشتغل في الشوط الواحد وهل الكاميرا مان بيغير كل قد ايه الكادر وكلام فاضي على اساس ان انا مخرج الروائع اللي لسة ما اتعملتش
في مرة يوم جمعة من ذات الجمعات لاحظت ان جوزي خايف علي شوية زيادة
وخلي بالك على نفسك ومش عايزك تموتي بدري وصحتك مش عاجباني
انا ما فهمتش
عدى الاسبوع وعلى الجمعة اللي بعديها ولا كأن فيه حاجة عادي قومي اعملي وسوي وهاتي على الرغم ان ساعتها كنت تعبانة
ومع تكرار موقف خلي بالك من نفسك على فترات بدأت اربط بين الفيلم العربي اللي بنتفرج عليه وبين الخوف علي صحتي لان البطلة لما تكون مريضة او عيانة جوزي يخاف علي ويعاملني حلو بتاع اسبوع
وقلت لجارتي انا حأتأكد من الموضوع ده بس انا مش عارفة الافلام اخبارها ايه لان انا مش متابعة جيدة للافلام
تأكدت بعد كدة ان الموضوع ده حقيقي ومرة كنت قاعدة بعد الظهر باشرب الشاي مع جوزي لقيت جرس متواصل
وفتحت الباب لقيت جارتي بتقول لي فاتن حمامة حتموت النهاردة بالليل
يالا بينا ده معناه دلع لمدة اسبوع
وكان بها على الرغم من ان جوزي كان عايز ينام بدري وانا اقول له النهاردة فيلم حلو وهو يقول لي من امتى وانتي بتشوفي افلام عربي
بعد فترة الموضوع اصبح له اثار جانبية
مثلا مرة جوزي كان مش طايقني وبيعاملني بتحفز وانا مش فاهمة فيه ايه
احنا مش بنتفرج على افلام ايه اللي حصل
وكان رمضان واتاري احنا في رمضان بتفرج على مسلسلات
اتاري مسلسل الوقت ده كانت البطلة ميرفت امين  و كان اسمها حكمت هانم وكانت مفترية وبتعامل جوزها بطريقة فيها تعالي وكانت مش بتسمع كلامه
وبدأت اربط الموضوع شوية
وكان ابني معزوم على الفطار وانا قلتله ماشي وجوزي ابدا والف كلا
مش حيروح يفطر
اقوله يا سيدي ما يردش
وقال لي انا مش حاوصله
ولما قلت له طيب اوصله انا
فوجئت انه بيقول لي
انتي مش بتسمعي الكلام ليييييييييه
هو انا كل ما اقولك حاجة ما تسمعييييييش
انا كلمتي هي اللي تمشييييييي

سكت وبعد شوية قربت وقلت له
على فكرة انا ماليش دعوة بحكمت هانم
بصيت له لقيته بيضحك
وقعدنا نضحك وقال لي
فعلا انا قرفان منها قوي مش بتسمع كلام جوزها

ضحكنا وابني ما راحش الفطار ومن ساعتها ابقوا قابلوني لو شفت فيلم عربي واحد
ممنوع منعا باتا
انا ايش ضمني ان الست طيبة لتكون مفترية وتيجي على دماغي