يارب بلاي ستيشن

يارب بلاي ستيشن

 المشهد الاول :

الجد واقف قدام دولاب ويبص

الجد : النهاردة لازم حفيدي يعرف سر العائلة

ينادي

الجد : يا مروان تعالى حالا انا عايزك

والحفيد يدخل عليه يجري برعونة ومعه كرة على رأسه ويتحدث بلا اهتمام

الحفيد :  خير يا جدي ، انت عايزني ، ميسي جايلك اهو

الجد : بص يابني انا عايز اقولك سر ما تعرفوش عن عيلتك ولازم تعرفه

الحفيد : ايه يا جدي انت مش جدي والا انا مش ابنك ولا حفيدك مش قريبك

الجد : انا باتكلم بجد تعالى معايا اوريك في ايه في الدولاب

الحفيد ينظر بتشوف

الجد يخرج من الدولاب جهاز بلاي ستيشن

الحفيد : ان آن أأن أن

الجد : انت مش عارف ان الجهاز ده عمل انسان مشهور ومطلوب من كل دول العالم

الحفيد : ارهابي  

الجد : ولد ، بطل هزار انا بجد عايز اعرفك الجهاز ده عمل ايه في ابوك

الحفيد : ابويا

الجد : ايوة ابوك

الحفيد : ابويا الاستاذ الدكتور البروفيسور غريب السيد غريب الجهاز ده هو اللي عمله وانا كنت شاكك اني روبوت لغاية امبارح

الجد : ابوك غريب كان طفل بتاع مشاكل وساب المدرسة وطول النهار بيلعب كورة

الاضاءة تخفت وصوت الجد يحكي

المشهد الثاني

سيدة جالسة في منتصف حجرة متواضعة لا يوجد بها عفش والسرير عبارة عن مرتبة على الارض وكنبه صغيرة

الام : الله يهديك يا غريب مفيش حد في الحتة الا وانت عامل لي مشاكل معاه

غريب يدخل وملابسة متسخة ومعه كرة متهالكة ويرمي بنفسه على الارض

وينظر فيجد امه

غريب : عارفه يامه اكيد اكيد لو مارادونا  جاء هنا كان عمل لي تمثال ، انا جبااااار

الام : عارفة يا غريب جباااار دي يعني الكورة تكسر فانوس عربية الحاج مرسي اللي ساكن على الناصية وجباار دي يعني تكسر قزاز ام علي اللي تحتينا والست تيجي تزعقلي وتشتم فيك

يقوم غريب من الارض ويمسك الكرة وينطقها على راسه من فوق

الام : انا مش عايزاك جبار انا عايزاك ابن حلال والناس تحبك مش كل ما امشي في الشارع الناس تشتكيلي منك

غريب : يترك الكرة ويتحدث مع امه

بصي يامه انا ممكن ابطل كل اللي بتقوليه ده بس تجيبيلي بلاي ستيشن

انا ساعتها حاقعد عليها الاعب  مارادونا براحتي من غير ما اكسر حاجة ولا ازعل حد

الام : بلاي ستيشن مين هو انت مش عارف ده بكام

غريب : عارف غالي وبالف جنيه بس انتي بتشتغلي وممكن تجيبيهولي ، انا عارف انك محوشة فلوس وممكن تديهالي اجيب بيها بدل ما الفلوس تعطن وتطعمها يتغير

الام : يابني الفلوس دي عشان لو عييت وماقدرتش اشتغل وبعدين يعني بدل ما تروح المدرسة واديك مصروف تاكل اديك تحويشتي عشان تلعب كورة طول النهار

ربنا يهديك يابني

غريب : بصي انا لو مش حتديني فلوس اشتري البلاي ستيشن يبقى لازم تلاقيلي طريقة اجيبه بيها

الام : انت عارف يا غريب فيه طريقة سهله تجيب بيها البلاي ستيشن ، انت تروح الجامع وتقعد مع الشيخ يعلمك دعاء حلو كدة تقوله كل يوم قبل ما تنام عشان يجيلك

غريب : يا سلام هو الدعاء بيجيب بلاي ستيشن

الام : لا يا حبيبي ربنا هو اللي بيبعت ، يالا حاول يمكن ربنا يبعتلك واحد

غريب : والله انا مش خسران حاجة

يظهر الجد والحفيد

وراح غريب جري على الجامع عشان يقابل الشيخ ويتعلم الدعاء

المشهد الثالث

غريب يدخل الى جلسة مع الشيخ وحوله بعض الاطفال وهو يتحدث معهم ويسير بالقرب منهم وهو يمسك بالكرة في يده

ويقف بجوار الشيخ وهو يتحدث مع الاطفال

الشيخ : ان الله قريب مجيب الدعاء ، واذا سألك عبادي عني فاني قريب ، وقال الله تعالى : ادعوني استجب لكم

يقف غريب في منتصف المكان وينادى بصوت عالي

يارب بلاي ستيشن يارب

نفسي فيها يارب

نظر الكل لغريب وضحك الفتية فقال لهم الشيخ :

نكمل المرة الجاية وقام الجميع وظل غريب والشيخ

الشيخ : ايه يابني مالك

غريب : انت قلت ان ربنا بيستجيب لما ندعيه فانا بادعي انه يجيب لي بلاي ستيشن

الشيخ : وانت فيه بينك وبين ربنا عمار

غريب : هه

الشيخ : يعني دعوتك مستجابة

غريب : هه

الشيخ : طيب بتصلي وتصوم

غريب : هه ، بص انا امي قالتلي انك ممكن تقول لي دعاء ربنا يبعتلي بيه بلاي ستيشن وانا ناوي اتعلمه كويس واقوله كل يوم

الشيخ : بص يابني قبل ما تدعي اي حاجة لازم الاول تدخل من الباب والباب عندك مقفول

روح صلي كل الصلوات في ميعادها

صوم الاتنين والخميس

وتعالالي بعد اربعين يوم

مش تسعة وتلاتين

لا اربعين يوم وانا اقولك الدعاء

غريب :

اربعين يوم ويجيلي البلاي ستيشن ؟؟

اربعين يوم واقولك تعمل ايه عشان يجيلك البلاي ستيشن

يظهر الجد والحفيد

وراح غريب سمع الكلام وقعد فعلا يصلي ويصوم بانتظام لمدة اربعين يوم

المشهد الرابع

غريب نايم ووالدته تدخل تصحيه

الام : قوم يا غريب ربنا يهديك انا عايزاك تروح السوق تجيبلي حاجات للمدام بتاعتي

غريب : صباح الخير يامه هي الساعة كام

الام : الساعة ثمانية يابني والسوق فتح روح هاتلي فراولة

غريب : النهاردة الاتنين يا امه وانا صايم وصحيت الفجر اصلي

الام : طيب اروح انا احسن مانت دايما بتعملي مشاكل مع البياعين

غريب : هم اللي كلهم مشاكل ، انا باتخنق منهم وهم اللي حاطيني في بالهم وكمان انا النهاردة عايز اروح للشيخ ابلغه اني كملت الاربعين يوم وانا باعمل اللي الشيخ قال لي عليه واما اشوف اخرتها بلاي ستيشن والا كورة كفر

الام : هو انت منتظم في الصلاة وبتصوم عشان البلاي ستيشن

غريب : يعني مش قوي كدة ، انا اصلي عرفت في الجامع اني مش باعمل حاجة لربنا خالص وازاي يكون عندي عين اطلب منه ، على الاقل اعمل الواجب اللي علي

يسمع اصوات اولاد بتلعب في الشارع

غريب : انا رايح العب مع اصحابي شوية على ما ترجعي من الشغل وياريت تعملي حسابك على فطار ملوكي انت عارفة انا مش متعود اجوع

يجري للباب وهو بيقول

اوعى مارادونا جاي

الام : ربنا يهديك يابني

يظهر الجد والحفيد

الجد : وطبعا هو كان فاكر ان الصلاة ممكن تبعتله البلاي ستيشن

الحفيد : انت بتتكلم على ابويا انا

الجد اصبر واتعلم

المشهد الخامس

الجامع والاولاد حول الشيخ وغريب يدخل الى المكان ويقترب من الشيخ وهو يستمع للقرآن من احد الاطفال

غريب : سيدنا ، انا عملت اللي قلتلي عليه ادعي بقى ويستجيبلي

الشيخ : يشاور بيده لان ينتظر الى ان يكمل الطفل السورة

غريب : سيدنا الشيخ انا صايم كل اتنين وخميس والله باصوم واصلي ايه رأيك

الشيخ يبتسم ويمسكه من يده ويجلسه بجواره وينتهي الطفل من القراءة

الشيخ : كملوا سورة النبأ واسمعهولكم المرة الجاية

يقوم الاطفال من حول الشيخ فينظر الشيخ لغريب

ايوة قول لي عملت ايه

غريب : انا صمت وصليت والله يا شيخ اربعين يوم وانا منتظم جدا زي ما قلتلي كدة البلاي ستيشن تيجي يارررب بلاي ستيشن

الشيخ :

لا يابني انت كدة دخلت من الباب ولكن قدامك طوبة كبيرة قوي لازم تكسرها

غريب : طوبة ايه يا شيخ والنبي انا مستعجل والصيام هاددني

الشيخ : انا باتكلم عن الطريق اللي يخلي دعواتك مستجابة يا غريب ، مش انت عايز لما تطلب ربنا يستجيبلك

غريب : ايوة طبعا ما باصلي واصوم اهوه

الشيخ : لا يا غريب انت كدة عرفت ان فيه ربنا وبقيت مسلم انما عشان ربنا يسمع دعاك لازم محدش يدعي عليك يعني لازم تخلي الناس تدعيلك والا كل اللي بتدعيه بيقف في النص ويتمسح بكلام الناس الوحش عنك

غريب : ايه ده ؟؟؟ يانهار مش فايت ده انا كل الناس اللي في حتتي مش طايقني ، ده انا لازم اخد بالي لحسن كدة ولا دعوة حادعيها حتمشي

طيب الله يهديك دي دعوة وحشة والا حلوة لحسن مامتي بتقولها لي لما اقولها ادعي لي ان ربنا يبعتلي بلاي ستيشن 

الشيخ : دعوة الام دايما كويسة ما تخافش بس لما تدعليك ان ربنا ينولك اللي في بالك يبقى هي موافقة على البلاي ستيشن والا ايه رأيك

 غريب : ده انا كدة علي واجب كتير قوي عشان البلاي ستيشن تيجي

الشيخ : شفت ازاي انك مش واخد بالك ياللا روح اعمل الواجب اللي عليك وشيل الطوبة من السكة ونشوف حتدعي امتي و يمكن ربنا يستجيب ان شاء الله

الجد والحفيد

الحفيد :

احلف ان ده غريب ابويا اللي انت بتقول عليه كدة

الجد : والله يابني هو اللي باحكيهولك واسمع التكملة

المشهد السادس

غريب ينظف المنزل وهو يغني ابلة نظيرة جاية ، جاية بعد شوية ، جايبة قطنة تفتش عليه بعد شوية

الام تعود من الخارج ومعها اكياس محملة وغريب ينتفض ويجري

غريب : عنك يا ست الكل

الام : ايه يا غريب انا مش تعبانة

غريب : لا يا امه انتي بتشتغلي طول النهار وبتتعبي عشاني لازم اخذ بالي منك عيب كدة

الام تدعك عيونها

والله ما مصدقة ، ربنا يخليك ويهديك

غريب هاتي اعملك الاكل

الام كمان

انا خايفة احسد نفسي عليك

غريب يسمع نداء من الخارج باسمه

ايوة جااااي

الام رايح فين يا غريب

اصل ام علي اللي تحت كانت عايزة حد يشيل معاها حاجات بنتها وانا قلتلها حاساعدها

طيب روح وانا حاحضر الاكل ربنا يهنيك

غريب بس كدة ، مفيش دعوة تانية كدة

الام ويسعدك ويخليك لي

غريب هه وايه كمان

الام وينولك اللي في بالك

غريب هي دي يا ست الكل انا مستنيها

يظهر الجد والحفيد

وفضل غريب يساعد كل الناس اللي في الحتة لما بقى مفيش حد في الحتة ما يعرفش غريب وكان بيساعد الكل وبقى الكل يحبه والكل يلجأ له لما تحصل مشكلة وفي الآخر بعد شويتين راح للشيخ وهو مبسوط جدا

المشهد السابع

الشيخ مريض وهو جالس يسعل

غريب السلام عليكم ورحمة الله وبركاته ،

الشيخ : كح كح

سلامتك يا سيدنا الشيخ اجيبلك كوباية شاي بالليمون

الشيخ : الحمد لله انا بخير تعالى طمني عليك ، انا سامع عنك كل خير حقيقي انت زي ما بيقولوا مفيش حد في الشارع غير لما بتساعده

غريب يخجل

الشيخ : انت كدة مش بس شيلت الطوبة انت رصفت الشارع كله

غريب : تفتكر ربنا بيحبني وحيستجيب لدعايا

الشيخ : والله انا متهيألي ناقصلك حاجة واحدة لو عملتها تبقى ماشي في طريق صح

غريب : ايه يا سيدنا

الشيخ : انك كل مرة بدل ما تدعي مرة واحدة تدعي مليون  مرة

غريب : يا سيدنا بالراحة علي اليوم مش حيكفي مليون دعوة

الشيخ : ما هو انا حاقولك ازاي

عارف انك لما تدعي لحد الملايكة يقولولك ولك مثلها

يعني شوف كام ملاك ممكن يدعوا معاك

فاضل انك انت اللي تدعي للناس مش تستنى دعوتهم ليك

عرفت الطريق الصح فين وساعتها ابقى جرب تدعي دعوة حلوة كدة وتشوف ربنا ممكن يستجيب لك وانا متأكد انك حتلاقي مليون بلاي ستيشن هي اللي نفسها انك تلعب عليها

غريب : على فكرة يا سيدنا انا الايام دي مبسوط قوي وحاسس ان ربنا معايا وحيستجيب لي وانا عموما حاعمل بالنصيحة وربنا يخليك لي ويسعدك ويحقق لك اللي انت عايزه

يضحك الشيخ ويقول له :

فاهمك كويس يا غريب وانت كمان لك مثلها

يظهر الجد والحفيد

الجد : من ساعتها وغريب بقى الناس بتحبه وبتروح له في كل مشكلة وهو مبسوط وبيدعي للكل

الحفيد : انا ملاحظ فعلا ان والدي دايما بيدعي لكل الناس

الجد : ما الموضوع ده بقى في شخصيته من ساعتها بس مش دايما الدنيا بتبقى سهلة

انت عارف حصل له حاجة غيرت الدنيا كلها

المشهد الثامن

غريب : مامتي ، حبيبتي ، انت فين

يسمع انين

امه انت فين

(بلهفة)

يبحث عنها ويأتي بها وهي مصابة في قدمها وتتألم

غريب : ايه اللي حصل

الام : انا كنت طالعة على الكرسي عشان اجيبلك الفلوس اللي محوشاها من فوق الدولاب بس الكرسي اتكسر مني

غريب : وليه تعملي كدة الف سلامة عليكي

تعالي اقعدي

الام : تتألم بشدة

غريب : ياااارب انا مش عارف اعمل ايه ، يارب اشفيها وابعتلها اللي يريحها

يسمع خبطات على الباب

غريب يتعجب ويذهب لفتح الباب

يدخل الجد في سن اصغر

الجد : هو ده بيت غريب

غريب : ايوة يا بيه

الجد : انا الدكتور علاء صاحب العمارة الجديدة اللي على ناصية الشارع ومحتاج حد يعمل لي باب حديد وقالولي انك انت تعرف الناس كلها هنا

غريب : دكتور

ما تقلش دكتور عظام

الجد : ايوة انا دكتور عظام

غريب : ينظر الي السماء

احمدك واشكر فضلك يارب

اتفضل يا دكتور انا اصل مامتي وقعت من على الكرسي وشكل رجلها اتكسر

الجد : وريني كدة

يكشف الجد على قدم الام

الجد : ده كسر

الام : تتألم

الجد : لازم تيجي معايا على العيادة عشان اجبسها لان الرجل مكسورة

غريب :

الله يخليك يا دكتور

المشهد التاسع

الام تدخل وغريب يساندها ومعهما الدكتور علاء وتجلس الام

الجد : مش مشكلة تيجي توريني بتاع الحديد النهاردة عشان تلحق تذاكر

غريب : انا مش باروح المدرسة

الجد : ليه كدة

الام : طلع من المدرسة بقالة كام سنة ومش حينفع يرجع الا بامتحان محو امية وهو الكورة واخدة دماغه يا دكتور ، ده كل يوم يحلم بمارادونا  

غريب : لا انا بالاعب مارادونا في الحلم

الجد : طيب ووالدك فين

غريب : والدي متوفي

الجد : طيب وانت بتشتغل ايه

الام : لا يا دكتور مش بيشتغل حاجة

الجد : بس الناس كلها عارفاه وهم اللي قالولي اجيله يوديني للصنايعي

الام : هو بيخدم الكل لوجه الله

الجد : طب ما تيجي عندي العيادة يا غريب اهو يبقى لك مرتب

غريب : تحت امرك يا دكتور انا اخدمك ببلاش والله

الجد : انا مش عايز تشتغل عندي ببلاش انا حاديك 30 جنيه في اليوم

غريب : ده انا اجيب كدة بلاي ستيشن في الشهر

الام : هه هه هه

زي ما قلتلك البلاي ستيشن واخدة دماغه وكل يوم بيلاعب مارادونا في الحلم

الجد : للدرجة دي ، خلاص يا سيدي حيجيلك بلاي ستيشن من عرق جبينك اهو

غريب : من بكرة الساعة 6 الصبح ابقى عندك

الجد : لا لا مش الساعة 6 الصبح لان العيادة بتفتح بعد الظهر

المهم انك تريح الحاجة وبعد شهر حآجي افك لها الجبس  واشوفك بكرة الساعة 5 وتعالى معايا وريني الحداد فين

 المشهد العاشر

الجد : هو غريب فين يا حاجة

الام : راح يجيب البلاي ستيشن يا دكتور ما انت عارف انه قبض امبارح

الجد : على طول كدة

الام : ده كويس اللي نام امبارح

غريب يدخل من الباب وايده فاضية

الام : ايه يا غريب فين اللي اشتريته

غريب : بعدين يا امه بعدين

الام : حد ضحك عليك واخذها منك والا ايه

غريب : بعدييييين يا امه مش وقته

الام : طلعت اغلى

يخبط الباب و

الام : استنى انا حافتح عشان امشي رجلي

صاحب المحل : غريب هنا

غريب : ايوة ياعم في حاجة الفلوس ناقصة والا حاجة

صاحب المحل : لا يا غريب الفلوس مظبوطة بس انا عايز اعرف انت اشتريت الكرسي اللي بعجل عشان الراجل الشحات اللي على الناصية

غريب : محرج

ايوة بس مفيش داعي كنت تقول

صاحب المحل

لا كان لازم اقول لان الشحات جاب لي الكرسي بعد ما مشيت وكان عايز يبيعهولي بخمسميت جنيه

غريب :

معقول ده نصاب

صاحب المحل

طول عمره نصاب وبيبيع مرضه للناس وياخد فلوسهم

المهم ان انا ما رضيتش اديله الفلوس واخذت منه الكرسي وادي فلوسك اهيه

الام : كتر خيرك يا عم والله

الجد : ايه اللي انا سمعته ده انت رحت اشتريت كرسي بعجل بدل البلاي ستيشن

الام : الله يباركلك يابني والله اصيل

الجد : اصيل دي كلمة قليلة على اللي عمله  ، على فكرة يا ام غريب ابنك ده اخلاقه عالية وانا مش عايز اسيبه

اديني الفلوس دي وانا حاعلمك بيها وادخلك احسن مدارس وبتوفيق من الله حاخليك اشهر دكتور عظام ، انا حاعتبرك ابني وافتخر بيك في كل مكان

يخرج الجميع ويدخل الحفيد ويتحدث الجد معه

ومن يومها فعلا دخل المدارس واتخرج من الطب و اتخصص في العظام  واتجوز بنتي ولكن اخلاقة العالية اللي خلتني احبه واعتبره من اهلي كان السبب فيها البلاي ستيشن