الجيران لبعضيها
وانا بنت كانت كلمة ماما الجيران لبعضيها
مثلا كان في مرة جيرانا من اليونان وكنا لبعضينا يعني ممكن العب مع بنت جارتنا الاجريجية وبقيت بحب قوي لما اخرج اعمل نفسي من اليونان واتكلم زي اليونانيين باللغة اليوناني مثلا
انتي اسمك ايه للولد
انا لازم اسوفك انت قول ايه
هو ده بالنسبة لي الكلام اليوناني زي ما بنت جارتنا بتتكلم
ونتيجة اننا عائلة متنقلة فكتير من الاوقات نتنقل بين الشقق كمان
وبالتالي كان لي جيران كتير واصحاب كتير
ولما اتجوزت فهمت معنى الاستقرار
نوعا ما
يعني ان انا ممكن انام واقوم في نفس اللشقة ونفس السرير ونفس المدينة ونفس البلد لاكتر من عامين متتاليين
ويكون جيراني هم جيراني
جارتي وصديقتي وزميلتي في الكلية ورفيقتي في العمل مش اكتر من كدة تصوروا وبالتالي علاقتنا توطدت بسهولة
وكنا نمارس مبدأ الجيران لبعضيها كويس
عندك ملح
عندك طماطم
عندك ليمون
وفي يوم وانا باتفرج على التليفزيون وهم بيزيعوا جريمة قتل سيدة لزوجها وتقطيعه ووضعه في اكياس والمذيعة تقول لها وجالك قلب تقطعيه
المهم ان جارتي كانت دبت خناقة من التقيلة مع جوزها وكان نازل زعلان وانا قلت لما افضى اصالحهم
وفي نصف البرنامج وكان بالليل لقيت الجرس بيضرب وطلعت جارتي وقالتلي باقتضاب
عندك سكينة حامية
قلتلها طبعا وعطيتلها واحدة حامية جدا
شوية سألتني عندك مسن للسكينة
ايوة خذي
كمان شوية عندك ساطور
ايوة
وبعد ربع ساعة وانا رايحة جاية اجيبلها الحاجات دي وجوزي يسألني مين اقوله جارتي عايزة وعايزة
وفي الآخر قال لي انا قلقان على جوزها
قلتله وانا كمان
بعد حبة نضرب الجرس ونشوفه
قال لي احنا بعد نصف الليل عمري ما حاعمل كدة
وزمان لا فيه موبايل ومكانش دخل التليفون الارضي برضه
وضرب الجرس
فتحت الباب ووقفت قدام جارتي وهي بتقول لي بشخط
عندك اكياس
انا تقريبا ركبي سابت
قلتلها لازم اشوف جوزك الاول
هي ما فهمتش
وبعدين سكتت
وبعدين ضحكت وانا باقول لها
هو انتي الخناقة بتاعتك وصلت لفين
قالتلي
اتصالحنا وجابلي خروف وانا عمالة اشفيه واقطعه
قلتلها خروووووف بالليل كدة
وتقريبا هو فاهم المصالحة غلط
يعني بوكيه ورد ممكن
زجاجة برفان يجوز
انما خروف
يالا انا مالي هو اللي ممكن تتهور عليه مش انا
تعليقات
إرسال تعليق