الغذاء اليوم مفاجأة

-
اول ما اتجوزت كانت واخداني الحماسة
الفطار خمس نجوم وفوطة حمراء وفوطة صفراء ولازم حاجة سخنة وحاجة باردة وعصير
والغذاء خمس نجوم برضه فوطة حمراء وفوطة صفراء وحاجة مغذية
والعشاء نقول اربعة عشان ما اكذبش
انزل اشتري الخضار بنفسي وانقي كل حاجة
اقف طوابير الفراخ ولكن اياميها الحمد لله اتحلت الازمة وبقينا نلاقي من غير ما نقف طابور
وده لرغبتي ان جوزي يتفرغ للبحث العلمي ويترقى وانا كنت مهندسة كمبيوتر لكن عارفة ارتب نفسي
المهم ان انا كنت باحب اعمل الحاجة كويس لغاية لما خلفت
اصبح الوقت مش سايع لا خمس نجوم ولا خمس كواكب ولكن على مين
انا اموت نفسي بس اعمل الحاجة كويس
خلفت تاني
الكواكب بقت مصابيح لكن برضه باحاول
وفي يوم قلت لجوزي بعد اذنك وانت راجع من الكلية اشتريلي خضار لان معايا الاتنين مش باعرف اشتري بيهم
قال لي من عيوني
وجاء الظهر ومعاه الخضار
فتحت الكيس لقيت
خمسة كيلو بصل
ثلاثة كيلو فاصوليا
بس خلاص
الله
هو ده الخضار
قال لي ما انتي مش بتقولي عايزة ايه اللي لقيته
قلت له معاك حق هو ده اللي حتاكله
يوم السبت فاصوليا
يوم الاحد فاصوليا
يوم الاثنين فاصوليا
يوم الثلاثاء وهو راجع اول ما فتحت الباب قلتله ايه رأيك في المفاجأة النهاردة عاملة تغيير
قال لي ايه حناكل ايه
قلت له
فااااا صصصصصوووووليييييا


تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الاولويات تقلل من الحوادث بس للي مش معقد من حياته

-
  مشكلة المرور الاكبر هو احترام الاولويات يعني لما تكون في اشارة حمراء يبقى الاولوية للي اشارته خضراء لكن لو مفيش اشارات لازم انت نفسك تكون عارف مين يعدي الاول مش علشان هو احسن منك ولا علشان هو ابن باشا او ظابط ولا علشان انت عينيك مش خضراء وشعرك ناعم ولا علشان شبه محمد صلاح الالولويات بيحددها قانون المرور اللي احنا ناس كتير بتعتبره زيادة الفبريكة وسبوبة للي شغالين في المرور تعالوا نناقش الاولويات 1- الطريق الرئيسي بيكون له اولوية على الطرق الجانبية وبالتالي اللي طالع من الطرق الجانبية لازم يبص كويس قوي قوي امتى يدخل في الشارع الرئيسي (طبعا احنا بنعتبر اننا دايما في طريق رئيسي وان اي ح..ر ما يقفش يبقى لا مؤاخذة برضه ح..ر ) 2- لو احنا في طريقين فرعيين يعني انت شارع صغير في تقاطع والشارع اللي بيقطع اتجاهين يبقى الاولوية اللى على يمينك مش علشان هو ابن ناس وانت وحش ولا علشان هو خاله لواء 3- لو احنا في طريقين فرعيين و لو الطريق المتقاطع معاك اتجاهه شمال يعني بيقطع من على شمالك يبقى انت لك الاولوية مش علشان هو وزنه خفيف ولا علشان عاطل عن الشغل ولا علشان مش من كليات القمة و لكن علشان انت على ي
قراءة المزيد