قم للمعلم وفه التبجيلا قل للمعلم بالراحة علينا شوية

-
مذكراتي 87

كنت في زمن المعلم كالرسول وقم للمعلم وفه التبجيلا كاد المعلم ان يكون رسولا
وانا في صغري المدرس والا المدرسة دول شؤ
ولما اصحابي ييجوا علشان نلعب
اقعدوا على الكراسي
اجيب سبورة
اجيب طباشيرة
وهات يا شرح
طبعا بعد شوية باشرح لنفسي لان اصحابي بيتسرسبوا واحدة ورا التاني
لكن انا مش بايأس
والطباشير دايما في جيبي ، في ايدي ، في شنطتي المهم انه معايا لحسن اتزنق في حاجة اشرحها
واصحابي احب يسألوني علشان اجاوب
ومكنتش اعرف ان عملية الشرح دي موهبة ومش كل من مسك طباشيرة بقى مدرس .... بيفهم
فضلت احلم اطلع مدرسة لغاية الكلية انبهرت وقلت لا انا حاطلع مدرسة في الكلية واخد الدكتوراه بقى واعمل ابحاث بقى وابقى حاجة كدة اوعى من وشي
طلعت التانية على الدفعة ، حلو  ، لا مش حلو
لاني بدأت اشرح في سكاشن واحل مسائل مع الطلبة
وبعد اول سكشن لقيت الاول بتاع الدفعة جاي الاوضة بتاعة المعيدين وبمنتهى الادب بيطلب مني انه يحضر مع المعيدة التانية مش انا
قلت له قوي قوي مفيش اي مشاكل ولو عزت حاجة قول لي
كمان مرة اتنين جم يستأذنوا انهم ما يحضروش وانا بمنتهى الروح الرياضية ، قوي قوي مفيش مشكلة
ولما ادي السكشن الناس تنعس وتنام وتفقر وراسها تقع
 الله هو ايه الموضوع الناس مالها مستغبية كدة
واطلع من موضوع لسؤال لحتة ومفيش واحد يوحد الله ويسألني سؤال
مخدتش في نفسي وقلت الطلبة دايما مش بتركز وسبت الكلية لاسباب يطول شرحها واشتغلت في شركة كمبيوتر
اشرحي يا كوكا هانم للموظفين ما هو الكمبيوتر والبرمجة والكلام اللي انا باحبه
وابتدي بحماس والناس نيام نيام
قلت دول موظفين واكيد بيتعبوا وبييجوا بعد يوم عمل
قالولي ادي زمايلك في الشغل بتوع التسويق والمبيعات محاضرات عن الحاسب الآلي علشان يعرفوا يسوقوا
قلت لمديري انت اكيد بتهزر ده انا حاخليهم يفهموا الكمبيوتر ومش بعيد من بكرة يشتغلوا مبرمجين زيي كدة
ودخلت وشمرت كمي وهات يا شرح وزمايلي يشربوا في قهوة وشاي وانا هاتك يا شرح
لغاية لما لقيت واحد نعس وبينام
بدأت بعد كل العمر ده اعرف ان انا لي صوت امومي فيه هدوء جميل بيخلي كل اللي يحضر لي محاضرة يشعر بانه زي ابني وان انا باحكليهم حدوتة حلوة
ومن ساعتها ما بطلتش شرح برضه عيب دي هواية
بس بقيت اولع النور العالي واسقع المكان جدا لما الطلبة او الحاضرين لونهم يزرق واسكت في النص علشان يفوقوا وانكت كل عشر دقايق علشان الدم يدخل في الدماغ واصرفلهم قهوة تركي بن تقيل على حسابي
وفي آخر كل محاضرة اختمها بكلمتي المشهورة
وتوتة توتة خلصت الحدوتة حلوة والا ملتوتة
وتنتهي المحاضرة وللاسف بينادوني اديها تاني علشان كانت حلوة

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد