العريس يقعد بعيد

مذكراتي 88

كنت في الكلية مركزة على المذاكرة والمحاضرات وكل ما واحد معيد والا حد يبدي اهتمام كان لي ردين للفعل لو مش عاجبني اهمله ولا كانه موجود ولو عاجبني اعاملة  كما الزنوج في العصور المظلمة في امريكا وده علشان ما يعرفش انه عاجبني
المهم لما اتخرجت بدأ الموضوع ما يبقاش اعجاب بقى يقولوا ممكن نقابل حد من البيت لان انا مش ممكن ادي فرصة لحد يهوب ناحيتي
هم الناس كانت فاكراها عنطزة وغرور وانا الموضوع بالنسبة لي كان خجل شديد ولكن مع الادعاء بالبرود وعدم الاهتمام لان مكنتش باحب حد يعرف مشاعري
قعدت في كليتي سنة معيدة بادرس في السكاشن والمحاضرات لان دكتوري كان عاجبه دماغي وانا فاكرة نفسي باعرف اشرح وحاجة تحرير انما الحقيقة ان انا كنت بابقى فاهمة الموضوع لدرجة اني كنت باعتبره مش لازم يتشرح لانه سهل جدا وعلشان كدة كنت ادي مسائل واحسب واضرب واصول واجول وفي النص اسمع واحد بيشخر
اقول معلش ما احنا كلنا كنا طلاب وموضوع النوم في المحاضرات ده مقبول تلاقيه كان سهران بيذاكر
وتكررت الشخير وعرفت ان انا مش باعرف اشرح كويس لما وصل اعداد الحاضرين لسكاشني يقل عن عدد اصابع اليد
اهم شيء ان المشرفين على رسالتي كان عندهم انبهار بهذا الذكاء اللي جابني لورا لان طبيعي جدا ان العرسان بتهرب من البنت الذكية يقولك حتقعد تناقشني في كل حاجة ومش ناقصة
وكام واحد قبل ما يتقدم يقول لوالدي مش عايزنها تشتغل ووالدي يتخض دي شاطرة والتانية على دفعتها في هندسة وازاي تسيب كل العلم
مرة بقى واحد من الدكاترة قال لي فيه واحد عايز يتقدملك قلت له على البيت
قال لي مش تشوفيه
انا قلت له انا ما باشوفش عرسان على البيت
قال لي مش يمكن ما يعجبكيش قلت له ، ما يعجبنيش على البيت برضه
انا اساسا باتكسف من خيالي ويقولي شوفي عريس في الكلية تبقى مصيبة
وفي اليوم اللي كان حييجي يتقدم مامتي وبابايا بيسألوني هو شكله ايه
قلت لهم مسيرنا حنعرف سوا
المهم ان انا كنت حاموت اعرف هو شكله ايه وهو مين
فعند مامتي بين الصالون والليفنج فيه بارافان كبير بيغطي الصالون فانا قررت انظر نظره سريعة قبل ما ادخل علشان ما يبانش علي انفعالات سواء لو كان وسيم فانبهر او العكس فاحبط ورحت قاعدة على الكنبة اللي في ظهر الصالون وبدأت امد راسي من ورا البارفان بخباثة وساعة ما راسي وصلت خلف البارفان اكتشفت ان مناخيري كانت بين خصلات شعره الكثيف والذي امتلأ بالزيوت
على ايامنا مفيش جل ولا حاجات من النوع ده كانت زيت زيتون وزيت لوز والا مش عارفة كان ايه المهم ريحة فظيعة وما قدرتش اقول حاجة لان لو اتلفت بس حيلاقيني حطة وشي في شعره
جريت بسرعة والحمد لله انه ما عرفش ان انا اللي كنت في قفاه وطول ما انا قاعدة اقول له اصل بنت اختي شقية جدا ومامتي مش فاهمة ايه اللي جاب سيرة بنت اختي في القاعدة ومعرفتش ان طول القاعدة ريحة الزيوت فضلت في نخاشيشي ومقدرتش في القاعدة دي ارفضه علشان مش بيغسل شعره كويس واستنيت لغاية لما لقيتله عيب جوهري ورفضت
بعد كدة اي عريس انصحه يقعد قدام حيطة علشان ما حدش يدخل راسه في قفاه