الاولويات تقلل من الحوادث بس للي مش معقد من حياته
مشكلة المرور الاكبر هو احترام الاولويات
يعني لما تكون في اشارة حمراء يبقى الاولوية للي اشارته خضراء
لكن لو مفيش اشارات لازم انت نفسك تكون عارف مين يعدي الاول
مش علشان هو احسن منك ولا علشان هو ابن باشا او ظابط ولا علشان انت عينيك مش خضراء وشعرك ناعم ولا علشان شبه محمد صلاح
الالولويات بيحددها قانون المرور اللي احنا ناس كتير بتعتبره زيادة الفبريكة وسبوبة للي شغالين في المرور
تعالوا نناقش الاولويات
1- الطريق الرئيسي بيكون له اولوية على الطرق الجانبية وبالتالي اللي طالع من الطرق الجانبية لازم يبص كويس قوي قوي امتى يدخل في الشارع الرئيسي (طبعا احنا بنعتبر اننا دايما في طريق رئيسي وان اي ح..ر ما يقفش يبقى لا مؤاخذة برضه ح..ر )
2- لو احنا في طريقين فرعيين يعني انت شارع صغير في تقاطع والشارع اللي بيقطع اتجاهين يبقى الاولوية اللى على يمينك مش علشان هو ابن ناس وانت وحش ولا علشان هو خاله لواء
3- لو احنا في طريقين فرعيين و لو الطريق المتقاطع معاك اتجاهه شمال يعني بيقطع من على شمالك يبقى انت لك الاولوية مش علشان هو وزنه خفيف ولا علشان عاطل عن الشغل ولا علشان مش من كليات القمة و لكن علشان انت على يمينه
4- لو انت متقاطع مع طريق اتجاهين وانت رايح مع اتجاه المرور اللي قريب منك يعني محود يمين و الطريق قدامك كله رايح يمين يبقى تعدي مع المرور ما تستناش اشارة بس تهدي وتبص كويس علشان تنضم الى المرور اللي ماشي
5- الميدان او الدوار زي ما بيسموه في بلاد تانية او round about ده له عدة اولويات
أ- الاولوية للخروج من الميدان يعني لو داخل وواحد خارج تسيبه يخرج مش علشان هو لابس ماركة معروفة ولا علشان عنده فولورز كتيرة ولكن علشان الميدان يفضى والعربيات التانية تدخل
ب- لو انت داخل الميدان علشان تحود اول يمين في الميدان ما تدخلش جنب المركز بالعكس خليك على الحرف تماما لانك مش حتعطل حد و حتخرج بسرعة
ج- لو انت داخل الميدان علشان ماشي طوالي يبقى برضه تاخد الدائرة اللي برة ما تدخلش جنب المركز علشان انت حتمشي على طول وفي الخروج من الميدان تعمل اشارة يمين علشان اللي داخل الميدان من اليمين يعرف انك خارج و ما يكسرش عليك ويبقى عارف انك حتخرج في اول فتحة
د- لو انت داخل الميدان وحتخرج من ثالث فاتحة يعني على شمال الميدان بتدخل من الحارة الاقرب لنصف الميدان يعني لو الشارع حارتين تاخد الحارة الشمال وتدخل على وسط الميدان وتعمل اشارة شمال بس الاولوية للي خارج من الميدان اوعى تكسر عليه احنا عايزينه يخرج سليم وده علشان انت ابن ناس محترم مش علشان انت ضعيف ومنكسر
هـ- لو انت حتلف الميدان وتخرج ارجع للنقطة اللي قبل دي علشان زيك زي اللي حيخرج من ثالث فاتحة و انت خارج من الميدان لازم تعمل اشارة شمال علشان اللي في الميدان واللي داخلين يعرفوا انك خارج
و- اي واحد خارج من الميدان له اولوية
ز- الاولوية للي خارج من الميدان
ح- لو لقيت حد خارج من الميدان سيبه هو مش بيخرج قبل ما انت تدخل علشان غششك في الامتحان وماسك عليك ذله
ط- ربنا معاك وتقدر تخرج من الميدان من غير ما حد يكسر عليك و يبقى عايز يشيلك من على وش الدنيا
.
.
الاولويات هي اللي بتساعد على تسهيل حركة المرور وحفظ الارواح
التزاحم و الرغبة في ان اكون مركز الكون بيتعمل بلاوي
..
بالسلامة
تعليقات
إرسال تعليق