حتى لا تسير كفيفا

الآية دي عجيبة بكل المعايير
لازم نتدبر فيها جامد جدا
بتتكلم علينا وفيها تشبيهات لازم نفكر فيها
سورة الحج
اعوذ بالله من الشيطان الرجيم
أَفَلَمْ يَسِيرُوا فِي الأَرْضِ فَتَكُونَ لَهُمْ قُلُوبٌ يَعْقِلُونَ بِهَا أَوْ آذَانٌ يَسْمَعُونَ بِهَا فَإِنَّهَا لا تَعْمَى الأَبْصَارُ وَلَكِن تَعْمَى الْقُلُوبُ الَّتِي فِي الصُّدُورِ
.
كلنا عارفين ان القلوب جمع قلب وهو القلب اللي بينبض بالدم ولكن هنا ربنا بيتكلم على اللي جوانا لان القلب ساعات بيتقال عليه الفؤاد ولكن القلب اللي لما تقلب الحاجة وتطلع قلبها او قلب العلبة يعني جواها
هنا ربنا بيقول اننا ساعات بنمشي في الارض ومش حاسين باللي حوالينا يعني مش قادرين نفهم اللي بيجرا ونعقله يعني مش بس جوارحنا اللي بره لا كمان اللي جوانا مش حاسس وكلمة يعقلون بها برضه فيها كلام
العقل في العربي جاية من عقل يعني ربط حاجة بحاجة وفي الهوميوباثي بيقولوا العقل سليم لما يكون بيربط الاحداث صح وبيبنيها على بعض
يعني هنا ربنا عايزنا لما نمشي في الارض نربط الدنيا ببعض لان كل حاجة في حياتنا وفي الدنيا مربوطة بربنا وبقدرته وهو بيعمل كل حاجة لحاجة تانية وكلنا شفنا ازاي حتى الحيوانات ربنا بيسخرها لبعض احيانا مش بس احنا
وبعدين اتكلم عن الآذان اللي بنسمع بيها لان ساعات كتيرة الناس تكلمك وانت غايب في حاجة تانية يعني عندك اذن ولكنك لا تسمع بها
يعني خليك مصحصح للدنيا حواليك والنتيجة لو انت ماشي مع نفسك بس ومش بتربط الدنيا ببعضها والاحداث سوا حتبقى زي الاعمى وبرضه هنا ربط العمى بالقلب وساعات الناس تقول ده اعمى القلب يعني مش بيفهم حاجة صح وهنا خصص القلب اللي في الصدر يعني القلوب اللي عايزنا نعقل بيها هي كل ما داخلنا ولكن النهاية ان قلبك مش بيتحرك و بيتخبط زي ما يكون واحد مش شايف وماشي بيتخبط ويا اما واحد بياخد بايده يوريه يا اما هو بيحسس ويمشي حسب ما جوارحه تاخده
ايه العمق ده
الصراحة اية مكنتش قادرة اكتب عليها الكام يوم اللي فاتوا علشان الموضوع عايز تركيز جامد
حاولوا على قدر امكانكم التمعن في الحياة واخذ العبرات من اللي بيحصل وربط الاحداث صح علشان ما نبقاش زي الشخص الكفيف اللي بيعتمد على الناس هي اللي توديه وتجيبه