نبذة بسيطة عن كوهينور

انا اللي كنت باروح امتحان الرسم الهندسي من غير المسطرة والاستونج
انا اللي كنت باكتشف ان العربية ما فيهاش بنزين بعد ماتقف في نصف الشارع
انا اللي كنت بانسى اولادي في الملجأ بعد ما اوزع الاكل والشرب والعب مع العيال واروح البيت اكتشف ان اولادي هناك
انا اللي كنت في رمضان ارجع من الشغل ناسية اجيب بنتي من الدرس اللي بتحضره في الثانوية العامة
انا اللي عمري ما عملت مصروف للبيت ولا اعرف باصرف كام
انا اللي باحط فلوسي في الشنطة وباسحب منها من غير ما اعرف سحبت كام ولا معايا كام
انا اللي لما اسافر لازم اقعد ابص على الناس اللي معايا في الطيارة والاتوبيس علشان افتكر شكلهم علشان ما اتوهش واعرف اوصل للمكان اللي عايزاه
انا اللي ممكن انسى اسماء كل اصحابي لكن عمري ما انسى الخير اللي بيعملوه معايا
انا اللي غيرت حداشر مدرسة وعندي اصحاب في كل واحدة منهم باحبهم لغاية دلوقتي وان كنت نسيت اساميهم
انا اللي كان الجيران يخبطوا علي علشان العيش اللي في الفرن اتحرق والدخان طالع في العمارة كلها واعتبر ان ربنا كريم ان عندي جيران بيعرفوا ريحة الشياط
انا اللي اغلب المربات اللي عملتها اتحرقت واللي فضل عادة ما بتكون مكرملة
انا اللي نسيت تلات ارباع هدومي في الطيارات والمطارات والمطاعم
انا اللي ممكن تعزم ناس على الغذاء وتكتشف لما الجرس يضرب انها كانت عازماهم وتبتدي تعمل الغذاء وهم موجودين
انا اللي ممكن في اي عزومة بعد ما الناس تروح اكتشف حاجات ما طلعتش للعزومة وموجودة في الفرن او في التلاجة
انا اللي كنت لما ازور اصحابي ممكن اسيب شنطتي وتليفوني
انا اللي لما كنت باسافر لجوزي في بلد تانية يقول لي ما تنسيش العيال في المطار
انا اللي مرة فاتت مني الطيارة وانا في صالة الانتظار
انا اللي دايما عندي ثلاث محافظ علشان اكيد واحدة منهم فاضية والتانية فيها البطاقة والثاللثة مصروف البيت
انا اللي كل ما اطلب من ابني او بنتي يجيبولي حاجة من الاوضة التانية يدوروا حوالي الاول لان اكيد اللي باطلبه انا قاعدة عليه او جنبي
انا اللي لما كنت باكسر الحاجات في البيت ومامتي قالتلي اللي حتكسريه حتدفعي ثمنه كنت باسأل على ثمن الحاجة قبل ما امسكها
انا اللي وانا في سن الخمسين مامتي قالتلي امتى حتبطلي تقولي كل حاجة في اي وقت انتي لازم تكبري
انا اللي ممكن اكتشف ان امتحان ابني ده هو البكالوريوس بعد ما كنت فاكراه امتحان التيرم
انا اللي مكنتش باروح اجيب النتيجة بتاعة الامتحان الا لما حد من اصحابي يكلمني ويكون جايبهالي
انا اللي كنت باطلع بدل فاقد لكل البطاقات بتاعتي وكارنيه النادي واحيانا كنت اطلعه بعد التجديد بشهرين علشان عارفة انه حيروح
انا اللي ممكن اعطي محاضرة وبعد ساعتين ابص في الساعة اللي مش بتتحرك واصدقها وافتكر ان بقالي ربع ساعة باشرح بس
انا اللي الناس فاكراني لئيمة علشان بس ذكية حبتين ومحدش يصدق اني عشوائية لاقصى درجة
انا اللي ممكن لما اجي البس ادور على اللبس وابقى مش عارفة هو عندي والا اعطيته لجد غلبان وفي الاخر البس حاجة السنين اللي فاتت اضمن
انا اللي اشتري الموضة والبس المريح
انا اللي باسيب اصحابي لما احس انهم قلقانين مني او زعلانين علشان ما استمرش ازعلهم لاني عمري ما عملتها قاصدة ولكن ما عملته يتكرر
انا كوهينور وللاسف كتير من الناس مش بتصدق فاكراني مصحصحة وعارفة كل حاجة وباعمل كل حاجة بتخطيط
انا مثال للعشوائية اللي ممكن تطلع من البيت علشان عايزة تزور صاحبتها وتنتهي انها في الطريق تشتري للبيت حاجات وترجع وهي مش عارفة نزلت ليه اساسا
انا اللي كنت في الماجستير ارجع من الكلية للبيت الاقي نفسي في المنتزة وارجع علشان اروح البيت الاقي نفسي في الابراهيمية وانا كنت ساعتها ساكنة في لوران وفي الاخر وانا سايقة اقعد اقول بصوت عالي انا في لوران انا في لوران انا في لوران
انا اللي كل مدرسيني كانوا فاكريني باحاول اشغل اللي حوالي علشان انا اشطر وما يعرفوش اني باتكلم علشان افهم لاني ما اعرفش افهم وانا ساكتة
انا اللي بابقى نفسي كل اللي حوالي يكونوا مبسوطين وفي نفس الوقت ممكن اعك الدنيا واخليهم يلفوا حوالين نفسهم لاني ما اخدتش بالي من الاساسيات
انا باعترف اني مش منظمة ولا عندي اي نوع من التخطيط ولكن رغبتي الجارمة في مساعدة الاخرين بتخليني اركز في حاجة واحدة بس وهي الهدف وبالتالي الطريق اللي باسلكه دائما ما بيكونش قصير بس في الاخر بيحقق نتائج
انا دخلت هندسة وانا نفسي في الفنون الجميلة واتخرجت من كهرباء وانا نفسي ادرس كومبيوتر واخذت ماجستير كمبيوتر بعد عشر سنوات علشان اخذ بالي من عيالي
انا اللي مش بالاقي نفسي الا لما امسك ايد حد علشان اعديه الشارع ولكن لو حسيت انه بالطريقة دي مش حيمشي اخليه يعدي لوحده لان لازم يتعلم المشي
كل سنة وانتم طيبين وكل من ضايقته مش قاصده يسامحني
واللي مش مصدقني يسأل اخواتي واصحابي ونسايبي