شحات وبيتأمر

-
فيه شقة بتتوضب في الدور اللي تحتي وبالتالي الشنيور وخلافه شغال 8 ساعات يوميا
وبناءا عليه
انا اوافق على استضافتي عند اي حد بيته هادئ وساكت لحين الانتهاء من مرحلة الشنيور واحيانا تمتد لبعد التشتطيب خوفا من استخدام اي عمليات جلخ وخلافه ولكن بالشروط التالية
- الشاي في السرير بعد ما اصحى بدقائق معدودة
- شاي احمد ايرل جراي ولا استبدله باي نوع تاني حتى ولو كان من السيريلانكي بتاع بلاده
-الافطار بعد الساعة 11 لحين ما معدتي توافق على اي اكل
- الاكل كله بدون جلوتين ويفضل صباحا الكورن فليكس كيلوج اللي مش لاقياه خالص من ساعة ما البيه الدولار احترم نفسه وضرب الجنيه بالحذاء
- اللبن لازم يكون اصدقاء مبستر
- الشاحن جنب السرير بتاع الايباد والتليفون سامسونج
- ركن يصلح للكمبيوتر الديسكتوب وحبذا لو معاه برينتر
- ممنوع التليفزيون ساعات الصبح والظهر والليل ممكن بعد الظهر وبصوت واطي علشان ما اسمعوش
- الموسيقى المسموح بيها كلاسيكية وممكن شوية بوتشيللي لو في مود كويس وده مش دايما
- استضافة الاحفاد والاولاد يوم في الاسبوع علشان ما نقطعش عادة
- تذكيري بكل الادوية والعلاج
-عصير طارج في الثلاجة لزوم الحركة المسائية بحثا عن طعام
-ثلاث او اربع شباشب متنطورين في البيت كله علشان لما انسى حطيته فين الاقي غيره
-تليفون ارضي لزوم المكالمات الطويلة علشان الموبايل بيعملي صداع
-محدش يشتكي اني باتكلم في التليفون بصوت عالي وده لان من ساعة زيت حبة البركة ما وقع عليه وانا باستعمل اللاود سبيكر
- ما يستجد من طلبات
اي اخلال باي بند من البنود السابقة يلزمه تعليل والا مش جاية
وناخد اول اتصال ونقول الوووو
الوووو
الوووو
ايه ده مكانش العشم
عموما انا عارفة من الاول انكم مش حترضوا
مانيش رايحة خلاص
خلي الشنيور يشتغل يا محمد
#ثلاثين_سنة_ولسة_خبط_ورزع_فعمارتنا
#اعمل_ايه_ياربي
#ان_مكانش_دي_جيه_يبقى_شنيور

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد