زيه زي الهوى

سورة طه
فَلاَ يَصُدَّنَّكَ عَنْهَا مَنْ لاَ يُؤْمِنُ بِهَا وَاتَّبَعَ هَوَاهُ فَتَرْدَى (16)
في الاية بيحذرنا ربنا من الناس اللي ممكن تصدنا عن يوم الحساب وبالذات اللي مش بيؤمن بيها
طبعا فيه ناس بترد عن الايمان بعد ما كانت مؤمنة وايا كانت الاساليب اللي بتتبعها وانا معايا حد في الفيسبوك كان كاتب ان طالما ربنا ما سألناش قبل ما يخلقنا فمش علينا العقاب لانه مش اختيارنا وعلى الرغم من ان ربنا بالفعل عرض الامانة علينا واحنا بجهلنا وافقنا اننا نحملها
صحيح محدش فينا حيفتكر انه قال كدة لان ده قبل الخلق الدنيوي اللي احنا فيه واللي هو اختبار احنا موجودين فيه وحنفتكر الوعد ده لما ربنا يرجعنا تاني ارواح ونعرض عليه مرة تانية
المهم في الاية كلمة اتبع هواه فتردى
انا ساعات باحس ان الهواء بتاعنا اللي بنشمه زي الهوى اللي هو رغباتنا وحبنا الغير مبرر لشيء لدرجة اننا مش بنشوف غيرها واللي بيعمل حاجة من غير احتراف بيعتبر هاوي لانه مش بيعملها باصولها ولكن بحب وهو بيكون مش متشاف لانك واخد الهوى ذريعة للي بتعمله سواء اللي ربنا عايزه او مش عايزه
المهم ان اللي بيتبع هواه في الدنيا عادة ما بيسقط والتردي هو السقوط الجامد كانك ماسك الهواء وبتعتمد عليه في وقوعك اكيد حيوقعك زيه زي الهوى