اللهم اجعلنا من عبادك الذين ليس لابليس علينا سلطان

وَاسْتَفْزِزْ مَنِ اسْتَطَعْتَ مِنْهُمْ بِصَوْتِكَ وَأَجْلِبْ عَلَيْهِم بِخَيْلِكَ وَرَجِلِكَ وَشَارِكْهُمْ فِي الأَمْوَالِ وَالأَوْلادِ وَعِدْهُمْ وَمَا يَعِدُهُمُ الشَّيْطَانُ إِلاَّ غُرُورًا
.
استفزَّ فلانًا : أغضبه وأثاره ، أزعجه ، هيّجه
استفزز يعني اعمل اللي انت ناوي تعمله من هيجان واغضاب وازعاج كلها حاجات فيها حركات سلبية يعني خوفهم (ممكن يكون خوف من مستقبل او خوف على الاولاد يتسبب في ان ناس تغلط او تسرق )
او اغضبهم (الشيطان ساعتها زي ما بيقولوا راكبهم وبيخليه يغلط ويقول ويتصرف تصرفات تخليه يغلط ويغضب ربنا )
او هيجهم (طبعا الهورمونات بتساعد في ان يكون هيجان في اتجاه الغلط سواء في الزنا او ما حوله )
او ثرهم (يعني يثير الناس بانهم يفهموا اللي قصادهم بالغلط زي شوف بيبص لك ازاي او شوف بيكلمك وهو بيعتبرك قليل وبيعلي صوته عليك وغيرها من الحاجات اللي تخلي الناس تكره بعض)
أجلب عليه : جمع وألَّب واستولى عليه
استولى على عقولهم بالاموال والخيل هو ما يتركب يعني اعمل كذا علشان تشتري عربية والا طيارة والرجل هنا الرجال يعني حتسيطر على ناس كتير وفي نفس الوقت تعالى لهم بالخيل والمشي وشاركهم في الاموال والاولاد باحس انه بيقولنا اننا لما بنسمع كلام ابليس وبنعمل الغلط كاننا بنشاركه وهو في كدة معانا في فلوسنا واولادنا
الاية دي جامعة بشكل مخيف وباحس ان فيها حالة حرب واستنفار كبيرة وربنا بيقول له لابليس بكل وسائل الغواية والسيطرة لوح لهم واوعدهم ولكن ده كله كلام فاضي
لان
غرورا : باطلا و خِداعا
كل ده خدع وكمان باحس ان كل اللي بيعمله ابليس نتيجة غروره ورغبته في التفوق وبالتالي وعوده كمان غرور يعني بيسلك المسلك ده معانا ويوعدنا نكون احسن من غيرنا
وده مسلك دائم عنده ان الواحد مننا عايز هو كمان يبقى الاحسن او على الاقل احسن من غيره
سبحان الله
الاية دي جامدة قوي وربنا يقينا شر الفتنة وشر ابليس
بس ربنا بيطمنا بعديها بالاية التانية
إِنَّ عِبَادِي لَيْسَ لَكَ عَلَيْهِمْ سُلْطَانٌ وَكَفَى بِرَبِّكَ وَكِيلاً (65)
اهوه
انت اعمل اللي تعلمه يا ابليس لكن عبادي وطبعا عبادي دول اللي بيعرفوا ربنا وبيعبدوه ومتواصلين معاه مالكش عليهم اي قدرة
السُّلْطَانُ : قوّة ونفوذ وسيطرة
يعني لازم نكون من عباد الله ونعرف ان ابليس ده ضعيف هو بس بيستفيد من ضعفنا احنا وبيسيطر علينا من رغباتنا وبيوعدنا وعود غرورة
اللهم اجعلنا من عبادك الذين ليس لابليس علينا سلطان
وحسبي الله ونعم الوكيل