خشية الاملاق

وَلاَ تَقْتُلُواْ أَوْلادَكُمْ خَشْيَةَ إِمْلاقٍ نَّحْنُ نَرْزُقُهُمْ وَإِيَّاكُم إِنَّ قَتْلَهُمْ كَانَ خِطْءًا كَبِيرًا
.
لما قريت الاية دي لقيت الخطأ ربنا قايله خِطْءًا وحبيت اعرف الفرق ولقيت ان في المعاجم كلمة
خطِئَ الشَّخصُ : أذنب ، تعمّد الذَّنبَ
وده اكيد اللي بيعمله اللي بيموت طفله سواء قبل او بعد ما يتولد
تلاقي الام في الجنين تسأل ألف مرة وتحاول تعرف اذا كان ربنا حيسامحها والا لأ وتلاقي الاب اللي بيدفن ابنته في الجاهلية هو عارف ان ذنب وبيعمله
طبعا معظم الناس بيهمها الفلوس واذا كان الاجهاض او القتل كما اسميه من خشية الاملاق
الاملاق يعني الفقر بس الفقر اللي زي الطبق بعد ما تلحسه
امَّلق الشَّيءُ : انملق ، صار أملس
يعني اللي خايف من الفقر الشديد بسبب الطفل ده يبقى لازم يعرف ان ربنا عنده رزقه
انا ضد ان الناس ما تعملش تحديد للنسل او على الاقل تنسيق او غيره لكن مش بالاجهاض
لعل الطفل ده كان رزقك مرهون بيه
لعل الطفل ده اللي يشيلك لما تكبر
لعل الطفل ده يكون طريقك للجنة
الطفل هدية جاءت من عند الله لا انت اللي جبتها ولا رغبتك اللي حققتها انما هي رزق زيها زي الفلوس
وياريت حد كدة يشوف اللي اخذوا نوبل كانوا اولاد وحيدين والا كانوا في عائلة كبيرة والا متوسطة
المهم التربية
يعني اسر زمان كان بيطلع منهم كتير بعيدون عن الانانية اللي فيها الاسر بتاعة الطفلين
كان الكبير بيربي الصغير
كان الصغير العائلة كلها تشيله لو والده مش موجود
اما بالنسبة للخشية هنا هو خايف مع ترقب يعني هو مش متاكد من انه حيفقره ولكن الحال اللي هو فيه بيخليه يخاف يجيبه
حتى في ناس اعرفها مش عايزة تجيب علشان المدارس غالية
هاها
تخيلوا
ده على اساس ان احنا عايزين اغلى مدارس مش علشان التعليم الاحسن ولكن علشان الطبقة اللي ننتمي اليها
المهم في النهاية اننا نصل بعدم الامان للحد اللي يخلينا مش عايزين الطفل او قتله دي مصيبة