اللجوء الى الله

أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَبًا.
.
هنا انا الصراحة مش عارفة ليه ربنا قال ام حسبت لان ام دي حرف عطف وبتكون تخيير بين حاجتين مثلا او جملتين
الحاجة التانية اللي محيراني طبعا انهم اسمه اهل الرقيم والرقيم اللي هي الحاجة اللي لها ارقام او تترقم والله اعلم برضه ليه اسمهم كدة
المهم ان السورة اتسمت باسمهم على اساس ان اسوأ واصعب فتنة في الدنيا بتكون الفتنة في الدين ودي اتمنى من ربنا انه يبعدها عني وعن كل اللي اعرفهم وعن العالم كله
الفتنة في الدين ان شيء يخليك تشرك بالله او تكفر بيه وده اللي حصل في الشباب او الصبيان اللي لجأوا للكهف
دول صبيان مراهقين
يعني قمة التمرد والبعد عن القيود
يعني الصبيان اللي حاليا كل همهم البنات والمنظرة
الصبيان دول اهلهم اتخذوا من دون الله الهه
مش عاجبهم الكلام ده وبيقاوموه
بيتقال ان الملك كان بيجير الناس على الكفر
وانه لما بيعرف ان واحد مؤمن بيضطهده او شيء من هذا القبيل
المهم ان الصبيان دول قرروا يلجأوا لكهف علشان يبعدوا عن الفتنة ويفضلوا يعبدوا ربنا
حاليا الموضوع بنفس الصعوبة والفتنة اشد كمان
العجب مش بس انهم في سنهم الصغير ومقاومتهم لرغباتهم العجب انهم قرروا مع بعض ان دينهم اهم من كل حاجة في الدنيا واعتزلوا الدنيا
والعجب ان ربنا حافظ عليهم مئات السنين علشان يرجعوا يشوفوا الدنيا بعد ما عادت للايمان بالله وبعد ما مشي الملك واهله
العجب ان ربنا خلاهم نايمين السنين دي من غير ما يمرضوا ولا يجيلهم قرح في اجسادهم
حافظ عليهم ووراهم ان اللي يلجأ لربنا عمره ما يخذله
قصتهم هي قصة اللجوء الى الله
قصة الهروب من الفتنة بدل من التعرض لها وادعاء القوة والقدرة عليها
الكهف ده رمز كبير قوي وبالتالي ربنا خلاهم زي اللغز
عددهم ما قالوش واعطى اختيارات زي ما يكون ربنا عمل كذا كهف في كذا زمن في كذا حتة
مش مهم العدد المهم انهم طلعوا بعد سنين يقولوا للناس ما تخافوش وماتتعرضوش للارهاب الفكري ولو مفيش مخرج اهربوا لله وربنا حيحافظ عليكم