فتنة العلم

في سورة الكهف من 60 - 82
قصة سيدنا موسى مع سيدنا الخضر عليهما السلام
قصة بتوضح جدا القضاء والقدر
وكيف ان ربنا بيقضي اشياء لا نعلم اسبابها حتى لو كنا انبياء ورسل ولكنها ارادة الله
ولكنها بتتكلم عن فتنة العلم كمان
يعني انا كل مرة اقراها ساعات احط نفسي مكان سيدنا موسى وساعات احط مكان سيدنا الخضر عليهما السلام
يعني اتخيل اني نبي ورسول مش اي رسول يعني ربنا كلمني وشق لي البحر وبعدين اروح اتعلم من واحد عمري ما شفته خصوصا ان سيدنا موسى كان بيقول لاتباعه انه اعلم اهل الارض فربنا اراد انه يعرفه ان العلم شيء والعلم بالقضاء والقدر شيء تاني خالص
المهم ان القصة اتبنت على الكلمة دي
ربنا حب يؤدب سيدنا موسى عليه السلام وخصوصا انه في سورة طه قال له انه بيصنعه على عينه
( ولتصنع على عيني ) 39
سورة طه
العجيب في القصة ان ربنا قال له دور عليه وحتلاقيه مكان ما تنسى الشنطة
تخيلوا الاعجاز
لما نسى الشنطة والمساعد قال له نسيت قال له ذلك ما كنا نبغ يعني هو ده المكان ورجع له علشان يقابل سيدنا الخضر
اهم حاجة انه كرسول بصعوبة يرجع تلميذ ولذلك دايما احس وانا باقراها انه في كل موقف تم قدامه كان بيعترض
والله وانا في المدرسة كنت ساعات اسأل علشان اقول للمدرس بيني وبين نفسي اني شاطرة وفاهمة ومش كلها كانت اسئلة علشان مش عارفة
المهم انه في اول اعتراض كان على السفينة
طبعا ربنا خلى الامتحان صعب
يعني واحد ركب سفينة وبوظها
اي واحد عادي يقول ده غلط ولكن هو رايح وهو عارف ان الراجل ده اعلم منه ولكن لازم يعترض
وسيدنا الخضر كان عارف ان اللي مش فاهم مش حيقدر يستوعب لان الاحداث بتبان بعد وقت زي ما واحد اعرفه مرض في يوم ما راحش في مكان حصلت فيه حادثة والناس اللي راحت بداله ماتت
المهم انه مش بيعترض يقوله انت بتعمل كدة ليه لو كان عايز يتعلم
لا
بيقول له انت بوظتها عايز تغرق اهلها
المرة التانية سيدنا الخضر قتل ولد
برضه اعتراضه انت قتلت نفس بغير نفس ولا فساد في الارض
المهم انه هو حط على نفسه شرط لو سالتك تاني يبقى لك العذر تبطل تعلمني
المرة الثالثة مكانش فيها حاجة غلط ولكن قال له انت ما اخذتش اجر على البناء ودول ناس كانوا ضدك
نحلل مع بعض
هو مكانش رايح يتعلم هو كان رايح يشوف ليه ده اعلم مني
وبالتالي كل استفساراته كان فيها نقد مش سؤال
شعرت ان ربنا هنا بيقول لنا ما تستكبرش انك تتعلم من اي حد
وبيقول لنا اصبروا على ما النتائج تظهر ما تستعجلش عليها
وبيقول ان مش كل حاجة وحشة تبقى لغرض وحش
وبيقول ان ربنا بيحافظ علينا ويبعت لنا اللي يبني السور علشان يتهد لما يعوز وفي الوقت المناسب لنا
القصة دي عظيمة وكلها مواعظ واتمنى من الله اننا ما نخليش اللي يعلمنا يقول
هذا فراق بيني وبينك
يارب اعطينا الصبر اللي يخلينا ناخد افضل ما يقال لنا ونتعلم