بسم الله الرحمن الرحيم ، عندكم حد غريب

-
كنت ام مثالية من حيث اني باتكلم بهدوء ومش بارضى اعلي صوتي عشان الاولاد لا تنزعج ولا تشعر بعدم الامان وكنت نسمة
نسمة صيف عليل ولكن لما حد يدوسلي على طرف والا واحد من الاطفال يعمل غلطة
اجارك الله
وجهي ينقلب شكله وصوتي يعلا وبابقى شرسة
وكانت تلك الاوقات قليلة بالنسبة للشهر الواحد
وفي يوم كان عندي اصدقاء واحدة وزوجها وكان الاولاد في منتهى الشقاوة ومش عارفة اتكلم معاهم لان دائما مبدئي في الحياة ان العتاب يكون بيني وبين الاولاد على انفراد لئلا اهدر كرامتهم امام الاغراب
واستحملت كتير لغاية لما فاض بي الكيل وقررت اعمل اي تصرف يلم المواضيع ويخلي الاولاد تهدأ شوية وبالاخص الخناقات اللي بتحلى امام الضيوف
اخذت بنتي من ايدها الى المطبخ وكان على بعد عدة خطوات من الصالون ووقفت في حتة متدارية ما يشوفهاش اي حد ورحت وبصوت مخيف وتعبيرات وجه استغفر الله العظيم وبطريقه فيها بعض افلام هتشكوك على افلام ليلة الرعب الدائم وقلتلها
خليكي مؤدبة احسنلك بدل ما اتقلب عليكي
طبعا الكلمات مكانتش برقة الكتابة
تخيلي عربية لوري بتزمر بصوت عالي
وفي العادة لما ازعق بالشكل ده بنتي بتحط ايدها على ودنها من الخوف
وبعدين وقفت شوية لغاية لما تمالكت نفسي وخرجت من المطبخ وانا بابتسم كان مفيش حاجة حصلت
رحت الصالون لقيت صديقتي وزوجها الاثنين عيونهم مدورة كما كحك العيد
بقهم مدور زي السميط
وشهم ابيض كما الدقيق
وأول ما وصلت قالولي
هو مين جوه معاكي
بصيت للمطبخ قلتلهم مفيش
راحوا واقفين وقالوا
طيب احنا نمشي عشان عندنا مشوار
اكتشفت ان صوتي في المطبخ الظاهر رعبهم هم شخصيا
افتكروا يمكن ان فيه بسم الله الرحمن الرحيم عندنا ضيوف من اللي بتنصرف
من بعديها استعملت اساليب من غير صوت بس عشان الضيوف

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد