ثلاث نكات لكل اسرة

فيه نكت تفضل تلزق وتستخدم دايما في الحياة ومن ضمنها
ان واحد سوداني كان قاعد بيتفرج على التليفزيون وسمع الجرس فقال لها
قومي افتحي يا مرجانة ـ سمع صوت مرجانة بتقول له من برة الباب انا مرجانة يا محمدين قوم افتحلي - قال لابنه قوم افتح لامك يا حسنين قاله الولد لا هي مرتك قبل ما تبقى امي فمن كسل الراجل ومش عايز يقوم فقال انت طالق يا مرجانة - اهي ما بقتش مرتي بقت امك بس روح افتح لها
المهم النكتة دي كانت مسار ضحك دائم ومستمر لان كل ما اطلب من جوزي طلب وهو كسلان يقول انتي طالق يا مرجانة
النكتة التانية
على واحدة ست بقها واسع جدا وكل يوم تزعق لجوزها وتفتح فمها للآخر وكل حاجة ليييييييييييييه واييييييييييييييه وفي يوم اتأخر جوزها فقالت له وبصوت عالي
كنت فييييييييييييييين
قال لها كنت عند حسن صاحبي
بتعمل اييييييييييييييييه
قال لها كنت باحاول اصالحه على مراته لانه طلقها
قالتله لييييييييييييييييييه
قالها اصل صوتها عالي وفمها كبير
راحت وبهمس وهي قافلة فمها تقريبا
مش معقول
ودي تتكرر كل ما اتنرفز او جوزي يتأخر
والنكتة التالتة
ان فيه واحدة من الصعيد اتجوزت وتاني يوم جم يباركولها لقوا جوزها مقتول
سألها ابوها ايه اللي حصل
قالتله
شرفي يا بوي
ودي ساعات ونتيجة مرضي بيحصل لي هلوسة وانا نايمة فمرة قمت بالليل وبصيت لجوزي وهو نايم ولقيته شكله غريب شوية وشعره منقط زي ما يكون التليفزيون الارسال بتاعه وحش وقلت هو ده جوزي والا ابني
ولما تعبت من التفكير قلت اشوف لو ودنه طرية يبقى ابني ولو ودنه ناشفه يبقى جوزي فقعدت امسك ودنه ولقيتها طرية قلت هو ايه اللي جاب ابني جنبي في السرير وليه مش نايم في سريره ورحت الحمام ورجعت لقيت اللي جنبي جوزي
تاني يوم صحى من النوم قال لي
ايه حكايتك طول الليل ماسكاني من وداني
ولما حكيت له قالي الحمد لله اللي ما قتلتنيش وقلتي
شرفي يا بوي
وكل ما يلاقيني تعبانة شوية وشكلي داخل على هلوسة
يقول لي على فكرة لو لقيتي اي راجل في السرير بالليل مفيش داعي تقتليه غالبا حيكون واحد خايف على شرفك