الانتخابات بات بات والتعلب فات فات فات

-
الانتخابات المصرية حدثت بالفعل في مثل هذا اليوم ونزل في الشوارع الشعب لينتخب وهو لا يعلم من ينتخب ومن يمثله
بالنسبة للقوائم فهي سهلة ومريحة لان الاحزاب المعروفة معدودة وانتشرت على الفضائيات
اما الفردي فهناك اكثر من مائة فرد مرشحون في دائرتي وكل اللي بيني وبينهم صورة في الشارع او اسم سمعته
اختار ازاي واعرفهم من بعض ازاي
ونتحدث مع بعض وتنتهي ان اللي اخترته انسحب من الترشيح
الله اعمل ايه يعني اروح ابوظ صوتي يعني
يعني اجيب واحد ممكن يلبسني في الحيط
قالك المجلس ده بتاع الشعب
وفي نفس الوقت المجلس قال مالوش صلاحية
الله هم بيصعبوها كدة ليه
طب انا اروح للمستوي اللي بعديه في الجيم ده ازاي
اموت الفلول ماشي
بلاش اخوان زي بعضه
السلف حيلبسونا اسود وينقلونا نقلة نوعية ونصبح نسخة من السعودية فبلاشهم اوكي
الليبراليين قللات الادب وحيقلعونا هدومنا بلاشهم
اليسار حيرجعنا زي ايام عبد الناصر الناس كلها فلسانة ومعهاش فلوس فبلاشهم
الفلاحين خلوا بالكم فيهم كتير جهلاء مش بيعرفوا يكتبوا ويقروا
العمال مش عمال
لاااااااااااااااا لأااااااااااااااااااااااااااااا
انا لازم اختار واحد من المية وتلاتين
بدأت اسأل في التويتر وقالولي على واحد
وتاني يوم وانا سايقة لقيته جنبي سايق عربيته واد شاب طموح
قلت جميل انا عايزة واد شاب طموح يتكلم عن بلدي بكل الطموح اللي في التحرير
هو ده ولافيش غيره
حفظت اسمه
قلت لجيراني عليه
كلمت اصحابي
كتبت على التويتر والفيسبوك
وقبل الانتخابات النهاردة افاجأ انه انسحب
لاااااااااااااااا لأااااااااااااااااااااااااا
يعني اروح اجيب مرشح من عند امي
يعني اقول حادي بادي
دورت على قائمة الفلول عشان استبعدها
وقائمة الحرية والعدالة
الحزب اللي انا تبعه ما نزلش فردي
وفي الدائرة بتاعتي ما نزلش قائمة
الحل ان انا حاختار واحد من الاسماء الجديدة زي تامر او عمرو او حاجة اهو اسم من الجيل اللي قد اولادي
والقائمة اسهل لان الاتجاهات واضحة
وقررت ان الحل الاسهل اني اقعد اعمل استخارة وادعوا الله جاهدة
الله دبر لي امري فانا لا احسن التدبير
الله دبر لي امري فانا لا احسن التدبير
الله دبر لي امري فانا لا احسن التدبير
الله دبر لي امري فانا لا احسن التدبير
الله دبر لي امري فانا لا احسن التدبير
وانام يمكن احلم بواحد من الفردي واقوم من النوم على صوت واحد
عمرو عمرو عمرو
اجري جري على اللجنة واقولهم انا عايزة عمرو
ابص للي حوالي
عمرو يا جماعة عمرو
والقاضي يزغرلي ويقول لي اسكتي بدل ما اطلعك من اللجنة
وانا اقول عمرو عمرو
وامسك الورقة الاقي مفيش عمرو في الورقة
فاعلم على اول اسمين واتكل على الله
واقول قدر الله وما شاء فعل
يارب بلدنا يتيمة مالهاش اخوات كانت من الاف السنين لوحدها والناس كلها محتاسة واحنا بنحنط وبنبني اهرامات
خليك معانا يارب على العدو الداخلي والخارجي
خليك معانا على الفلول اللي مش بيحبونا
خليك معانا على المتزمتين اللي عايزين يقرفونا
خليك معانا على اللي بيمسك فينا ومش عايز يسيبنا
الله دبر لي امري فانا لا احسن التدبير
والسلام عليكم ورحمة الله لاني لازم انام بدري علشان الحق احلم بعمرو

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد