انا عايزة ابقى احسن منك

الفرق بيني وبينك مش ان انا اجمل او اقصر او اشيك او اطول اوعيوني ملونة او شعري اكرت الفرق بيني وبينك ان انا مستعدة اسمعلك وانت بتشتمني واسمعلك وانت بتمدحني وفي الحالتين حافكر في اللي بتقوله واحاول اعمل اللي يخليني انا احسن دايما
الناس كلها بتحاول تتكلم وتطلع تقولك انا ما غلطش
كل الناس ما تحبش اللي يقولها ما تعرفيش او ما تفهميش او مش كدة او غلط ولكن
الحقيقة ان الدنيا كلها اتبنت على غلطة من آدم وربنا تقبل الغلطة وعلم ادم ازاي يعتذر ويتوب
الدنيا كلها اتبنت على غيرة من ابليس خلانا نغلط علشان يورينا انه هو الاحسن وان احنا اللي نسجدله مش هو اللي يسجد لنا
لو الناس كلها عرفت ان انا لما اتكلم يعني انا باغلط وان الغلط يتصلح باعتذار او توبة او تصحيح مكانش فيه حد ممكن يزعل من اي مناظرة او مناقشة او حديث لانه في الاخر حيتعلم
اتمنى ان انا اكون احسن منك علشان باغلط اكتر منك فاعرف ازاي ما اكررش غلطي
اتمنى ان انا اكون احسن منك لاني باعتذر اكتر منك لكتر اخطائي اللي باعملها علشان مش قاعدة مكاني خايفة اغلط
واتمنى ان انا اكون وصلت وجهة نظري
الانسان يخطئ ويعتذر ويتوب وفي كل مرة يرتقي