ليبيا التي في خاطري

-
عشت وانا صغيرة اسمع عن الفراعنة والاهرامات
لكن جيت مصر في مركب بضائع بعد ما اخدوا الباسبور من ابويا علشان كان عنده جريدة مصرية اسمها الفلاح في طرابلس ليبيا
وكان بيكتب فيها واحد صاحبه ليبي وبينتقد سياسة عبد الناصر
طب ورحنا ليبيا ليه من الاول
لان بابايا كان بيصلي في الجامع في وقت الاخوان فيه كانوا سبة ولعنة اوحش من لعنة الفراعنة
طيب ما يصلي ايه المشكلة
المشكلة ان بابايا مالوش اتجاهات سياسية وكان بيروح علشان يصلي ويعرف ربنا انتم عارفين ان الاصل الريفي يبعث على الايمان وكان يسيطر عليه الصوفية
امام الجامع ماجاش والدرس اتعطل يوم ورا يوم ورا يوم
لغاية لما بابايا قلق عليه وكل مايسأل حد عن عنوانه يلاقي الناس بتتهرب
لما عرف العنوان وجد ان زوجة الامام عايشة في نكد وظلم وقهر وعزلة لان النظام قبض على الامام لاشتباهه في انتمائه السياسي للاخوان
والست ياولداه من غير ولا مليم
طبعا اخذت ابويا الشهامة وبقى يبعت امي بالاكل والفلوس علشان الست ما تموتش من الجوع
ودي كانت نهاية فرقة ابويا واصبح بيتحارب في كل رزقه
سافر والدي لليبيا في ايام الملكية واخذنا في اواخر الخمسينيات لما كانت ليبيا بلا بترول ولا اي من الكنوز الداخلية ولا الثروة في اي شيء
كنا سعداء جدا ولكن لم نر ليبيين الا في الازقة والحواري ويعيش في البلد الايطاليين في اكرم وافخر الاماكن ويعيش الليبيون في الصحراء الجرداء بلازرع ولا ماء
كان الملك زي حسني كدة حاسس ان كل حاجة تمام وبيحاول يصلح في البلد حبة حبة ولكن اللي واكل خيرها الطليان
المصري في الستينات كان فرخة بكشك يعني اي ست فاتن حمامة واي راجل فريد شوقي
والدي كان بيحب الليبيين جدا وانا كمان الصراحة لكن مامتي كانت تقاوم الامتزاج وتخاف لحسن ندوب ونفقد هويتنا وعشان كدة ممنوع الكلام الليبي والهزار الليبي واللبس الليبي
فضلت اكتر سنوات طفولتي وشبابي في ليبيا ولما جاء القذافي كنت في اعدادي
كانت طرابلس فلة شمعة منورة
كنت باحب شارع الاستقلال وبيتسا الراجل اللي جنب الكاتدرائية وريحة القهوة في الأورورا
كنت باحب مدرستي اللي الفصل فيه اقل من 15 طالبة
كنت باحب الشواطئ الليبية الصخرية واقعد اتخيل اني قزمة داخل تلك الصخور وكانها جبال
كنت باحب صاحباتي الليبيات لما يقلدوني وانا باتكلم مصري
كنت باحب البريد الكبير في وسط البلد
لما نزلت في مركب افتكرت اني مش حاشوفها تاني
لكن بابايا رجع تاني لطرابلس وما رجعش مصر الا بعد ما مات عبد الناصر وعاش السادات وعاشت مصر حرة
البعد خلاني احب بلدي اكتر لكن ليبيا في خاطري هي المكان الجميل الهادئ
هي لمة الاسرة لان في الغربة بنقعد مع بعض اكتر من مصر
لما شفت القذافي مقتول ومتبهدل الصراحة فرحت للشعب الليبي
من ساعة ما القذافي مسك البلد ومفيش حاجة حلوة اتعملت لليبيا
كان عنده طموح انه يكون زعيم العرب بعد عبد الناصر
كان مستخسر مصر علينا ويقول دول شعب بلا زعيم
وكان مستخس نفسه على ليبيا وبيقول هم زعيم بلا شعب
تذكرت لما بدا في عمليات الجنان بتاعة وقال مانتوش ممتحنين الثانوية العامة لان اللي بيذاكر ده فار والدنيا مش عايزة فيران
افتكرت اصحابي الليبيات لما اتقبض على اخو واحدة صاحبتي وعاش بابايا نفس الايام بس كان بيبعتني اطمنهم عليه في السجن لان بابايا كان مستشار النائب العام ومنتدب لنيابة طرابلس
افتكرت ان الليبي لما بيثق في حد بيديله كل الثقة وان سبب عدم ثقتهم في الناس هم بعض المصريين الحدقين اللي كانوا بيلعبوا عليهم
افتكرت مسلسل القط الاسود لما كانت طرابلس كلها تقف عشان مش عارفين مين زعيم العصابة
افتكرت البلد اللي عشت فيها طفولتي ومقتبل شبابي وسبتها وانا مش مبسوطة وزعلانة على البلد اللي بيخربها واحد لا عمره حبها ولا انتمالها
الله يرحم ايامك يا ليبيا ويعيدها عليكي بالخير ان شاء الله
ان شاء الله حتكوني اجمل واهدأ وارقى وانت في عيون ولادك اللي حبوكي بجد وخلصوكي من الطغيان
عاشت ليبيا حرة مستقلة
عاش الليبيون احرار
وحسبي الله في اسرة الفقيد القذافي وكل من والاه

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد