هل يمكن ان تكره ذراعك

الكره مش من شيمة الشعب المصري هو يتقمص ممكن ، يزعل موت لكن القلب الابيض بيرجعك تاني لمربع صفر وتنسى الاسية وانا باستغرب الموضوع ده لان انا بالذات قلبي اسود فحمة اشيل الاسية وافضل فاكرة كل اللي اذاني مدى الحياة بالذات لو كان يقصد الاذى وشرير
اللي بيحصل في ماسبيرو ان المسيحيين ياخدوا مكان منفصل عن الشعب المصري ويحطوا عليه بصمتهم ويقفوا يقولوا دي بلدنا واحنا لنا حقوق بيحسسني فعلا ان اللي بيعمل كدة مش بيحب وطنه ولكن بيحاول يقول للمسيحيين انفصلوا عن الواقع الثوري المصري وخلي فيه مكان لكم بحيث ان اي حاجة تحصل في ماسبيروا تبقى المقصود بيها المسيحي مش الشعب المصري
انا شايفة ان السياسة المسيحية بقالها فترة تبحث عن الانفصال عن الجسد وكان ايد الوطن عايزة تبقى لوحدها وتسيب الدراع  ودي سياسة مش كويسة وسياسة فاشلة لان معروف في التراث وفي الفلسفة وفي كل علوم الدنيا ان تفرق تسد وان الوحدة قوة ولو اي جهة مسيحية او ناس واخده الموضوع بشكل سياسي فاشل انها تحسس المسيحي انه مكروه في بلدة وتمسك في الشيوخ المتباعين اللي نازلين جهل في جهل
الموضوع بتاع الفتنة مش حيوصل المسيحي لبر الامان ولو انفصلت مصر زي السودان مش هو ده اللي حتعيش بعده مرتاحة والمسيحي ياخد حقة بالكامل
احنا جسد واحد وانا مستعدة اقبل الصايع والجاهل لو مصري لان انا مساهمة في ضياعة وجهلة
لازم نرجع الشعب المصري واحد زي زمان ولما يقف قسيس ويخطب في الشباب ويقول لهم الجيش حيموتكم ومش بيحبكم هو اول واحد حيتلسع من الكلمة دي لان اللي مات دمه في رقبته والكره والعنف بيصيب الكل وأولهم اللي بينفخ في النار
اول واحد ممكن يتكوي اللي بيولع في النار لانه اقرب واحد فيهم
الكنيسة المصرية لازم تقف وقفة شديدة قدام الناس اللي بتشعل النار وبتفهم المسيحي ان المسلم بيكرهه وده مش صحيح لان مفيش واحد بيكره حتة منه مهما كانت هو انا اقدر اكره ذراعي
لو حد في كنيسة قالك المسلم بيكرهك ما تصدقوش لان فيه ناس القسيس كان بيجي مخصوص يقول لهم المسلم مش بيحبك وبيكرهك وانت ما تتعاملش معاه ولا تديله اي خدمة
والشيخ لو قالك ما تسلمش على المسيحي وما تقولوش كل سنة وانت طيب ما تصدقوش وقول لجارك وصاحبك وحبيبك كل سنة وانت بالف خير والسنة الجاية تكون احسن وبصحة
ولو واحد اذي مسيحي بكلمة او تلميح اقف قصاده وقوله عيب عليك انت مش مسلم
ولو واحد مسيحي قال كلمة على الجيش او على البلد قوله عيب عليك انت مش مسيحي والا ايه
احنا كلنا مصريين غصب عن القسيس المتطرف والشيخ المتطرف احنا كلنا مصريين بالعند في العالم كله
وخلي قلبنا ابيض اليومين دول لغاية لما الأزمة تعدي والجيش يرجع لشغله الاساسي
وانا مستعدة اسامح الجيش والشرطة وكل اللي غلط في بس مصر تبقى جسد واحد مفيش فيه حد يكره التاني