ماذا نفعل في الفتن (2)

 في سورة الكهف اللي بتقرأها يوم الجمعة ربنا عرض علينا فتن كتيرة وناس تعرضت لها واعطانا دروس كتيرة لطريقة التعامل معاها

الفتنة التانية ان لما تشعر انك تستحق رحمة الله وعطفه لجهودك وتفكيرك الدنيوي و تفتكر انك لازم تاخد مقابل شغلك وعملك وان اللي وصلتله في الدنيا قال ايه بشطارتك

وده واضح في صاحب الجنتين

ده واحد عارف ان فيه ربنا ولكن متأكد ان اللي هو فيه من شطارته وبالتالي قال جملة تشعرك بشعور مختلط ولكن صاحبه اتخض لما سمعها وقال له انت كفرت

اعوذ بالله من الشيطان الرجيم

وَدَخَلَ جَنَّتَهُ وَهُوَ ظَالِمٌ لِّنَفْسِهِ قَالَ مَا أَظُنُّ أَن تَبِيدَ هَذِهِ أَبَدًا

وَمَا أَظُنُّ السَّاعَةَ قَائِمَةً وَلَئِن رُّدِدتُّ إِلَى رَبِّي لَأَجِدَنَّ خَيْرًا مِّنْهَا مُنقَلَبًا

قَالَ لَهُ صَاحِبُهُ وَهُوَ يُحَاوِرُهُ أَكَفَرْتَ بِالَّذِي خَلَقَكَ مِن تُرَابٍ ثُمَّ مِن نُّطْفَةٍ ثُمَّ سَوَّاكَ رَجُلا

صدق الله العظيم

قال صاحب الجنينة المثمرة ما معناه ان اللي عملته في الجنينة دي مش حيروح ولو رحت في اي حتة عند ربنا حاعرف اعمل اللي احسن منها

وساعتها فكره صاحبه بان كل اللي انت فيه ده مش من شطارتك وقال له افتكر انت ايه ربنا هو اللي خلقك في الاصل من تراب وبعدين لما نزلنا الارض جئت من نظفة و عقلك و حياتك كلها ربنا سواها وهو اللي عملك الراجل اللي قدامي ده

و طبعا العقاب لما جاله ولقى ان مفيش حد حينقذه لا مال ولا بنون

فربنا قال الخلاصة ان لا الاموال ولا الاولاد هي الحل

اعوذ بالله من الشيطان الرجيم

الْمَالُ وَالْبَنُونَ زِينَةُ الْحَيَاةِ الدُّنْيَا وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلا

صدق الله العظيم

ان اللي بيتعمل من الاعمال الصالحات واللي بتفضل عند ربنا هي دي اللي فيها الامل مش اللي انت فيه لان مهما عملت انت مش عارف نوائب القدر ومصائب الحياة حتكون عاملة ازاي

ومن القصة دي نعرف اننا ما نتغرش بنفسنا ونفتكر ان اللي احنا فيه من شطارتنا و ما نخليش الشيطان يفضل يحكيلك على اللي عملته واللي بتعمله و ان كل ده حصيلة دماغ وفكر و عمل شخصي