قطط الاسرة المالكة

-
انا باحب القطط ولكن والدي الله يرحمه كان يرفض وجودهم في البيت وبعد الزواج وجدت ان حمايا الله يرحمه يحب القطط
الله
حيبقى فيه بيت فيه قطط وبمباركة العائلة المالكة
وحالعب معاها واديها حنان السنين
وحب السنين
ولعب السنين
وبالاخص ان قائد القوات المنزلية في صفي
دخلت البيت بعد ما حمايا جاب القطة وقلت له هي فين يا انكل
قال لي تلاقيها مستخبية في حتة
بس بس
يا فلانه
سألته هي اسمها ايه
قال لي ما سميتهاش
طب شكلها ايه
قطة حتكون شكلها ايه فار يعني
استنيت تطلع من مخبأها مفيش
يا هانم يا ست يا بتاعة انتي فين عايزة اصاحبك والعب معاكي
عدى اليوم اللي بنتغدى فيه عند حمايا وهي ولا حس ولا خبر
تاني يوم
يالا يا حبيبي نقضي اليوم مع والدك
طبعا هو ما حيصدق ويالا بينا
دخلت ادور عليها مفيش
هي بجد موجودة لان شفت مخلفاتها في الحمام جاتها القرف
بعد ساعة كدة وانا قاعدة في حجرة المعيشة قوم الاقيها بتخربش رجلي
هو ده اللي قدرتي عليه
مسكتها من ايدها وطلعتها
قطة فعلا ومفيهاش مسحة جمال
الوانها غريبة وشرسة
حاولت العب معاها
فشر هي اتخلقت تغلس علي بس
خلتني طول ما انا قاعدة رافعة رجلي فوق لان الشراب اتقطع ومش عايزة رجلي هي كمان تتقطع
بعد اسبوع من الهم ده سألت حماي
- هي القطة دي لازمتها ايه
قال لي
- امان من الفيران
-بس انا عمري ما شفت فار عندكم ومتهيألي عمره ما حيدخل فار
-ايوة بس القطط نفسها في البيت حلو يخليه انظف
-يعني مش للعب مثلا
-لا دي مش بتلعب
-دي لازم اسربهالكم او اسمها بسم فيران عشان تجيبوا غيرها
- تسميها انت اتجننتي
- لا يا انكل عشان يعني تبدلها بواحدة لذيذة وبتلعب
طبعا كلنا عارفين اني باهزر على الرغم من ان والدتي كانت دايما تقول لي بلاش الهزار في الجد الناس بتصدق
بعديها لقيت حمايا عينه علي في كل خطوة
ولو القطة جالها اسهال يجري يسألني
انتي حطيتي ايه في اكل القطة وانا والله بريئة
انا عمري ما كنت حاؤذيها وان كنت عايزاها تمشي من البيت
انما جبت لنفس الكلام وخلاص لغاية لما واحد ابن حلال قريبهم دكتور بيطري قال لهم ازاي تجيبوا قطط في البيت دي كلها امراض وبالتالي مشوا القطة ومشوا الحلم ان يكون عندي قطة في منزل الاسرة المالكة 

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد