قطط من انحاء العالم

القطة كائن لطيف الناس بتجيبه عشان تلعب بيه او معاه او جنبه بس المهم انه دائما يحب اللعب وبالتالي مسلي وبالذات للي ما عندهمش وسيلة للتسلية او اطفال
طيب الحتة دي عرفناها
اما موضوع القطط معايا فهو قصة لوحده
وانا صغيرة كان نفسي في قطة
والدي رفض
ليه
قال كفاية علي انتم يا حبايبي
طيب احنا ومعانا قطة
لا انتم بس
المهم بعد عدة محاولات مستميته ولان اختي الكبيرة تتميز بالحنان الجميل فقررت تحقق لي امنية حياتي وهي اقتناء قطة
عرفت بوجود واحدة امريكانية مسافرة ونفسها حد ياخد القط بتاعها يربيه وياخد باله منه وكان شرطها الاساسي ان الناس تحبه
وانا باحبه من غير ما اشوفه
اسمه سيلفستر
مش مشكلة الاسم نحلها بعدين ما انا اسمي كوهينور وعدت
طلبت السيدة الامريكانية عاشقة القطط ان تعمل انترفيو عشان توافق او ترفض
ماشي رحت عملت الانترفيو وشافت الحب الملتهب بيني وبين القطة فوافقت من اول مرة بس لازم اخذه يوم تاني بعد ما امهد له مكان في البيت واعطتني المانيوال
الساعة 10 يفطر
الساعة اتناشر البسكوت
الساعة 3 يلعب بكورة بينج بونج
بالليل الوجبة الاساسية ومش عايزة اقول حاجة ان بيت السيدة المحترمة متقطع ومهربد من كتر ما السيد المبجل سلفستر لازم يمرن ايديه على ايدين الكراسي ويخربش الكنب وغيره وانا لم اعلق على هذا برضه ما يمكن اعرف اربيه وامنعه من الالعاب كثيرة المشاكل اللي ممكن تتسبب في ان والدي يكرشني انا وهو
بعد عدة ايام ذهبت مع اختي حبيبتي الى السيدة صاحبة سيلفستر واخذناه وهو كان قاعد مسكين وغليان وساكت
وصلنا البيت وقالتلي اختي خلي القطة في حتة برة البيت لغاية لما بابا يوافق
فين برة البيت
كان اخويا في الموضوع معايا وهو احن واحد عرفته في حياتي وبالتالي قال انا حاخد بالي منه
واخذه واتاريه حطه في السطوح ولقيت تقريبا اخويا قرر ينتقل للاقامة في السطوح
يعني كل ما حد يعوزه ندور عليه وفي النهاية الاقيه داخل من الباب واقول كنت فيه يعمل لي علامه انه مع القطة في السطوح واحنا عائلة تتميز بالقدرة على التمثيل البانتوميم
حاولنا اقناع الوالد ولكن الصراحة لم يغير رايه
كل مصروفنا اتصرف على التونة والسردين وكل انواع الاطعمة بتاعة القطط ولانها اول قطة فمش عارفين ايه هو الاكل المثالي واكتفينا بما كنا نشاهده في الكارتون وهو انها تاكل منتجات الاسماك
سيلفستر يا كبد امه قاعد في الطل بقاله كام يوم ومش عارفين نقنع والدي
بدأنا في المساعي الدبلوماسية لحل المشكلة و سألنا كل الجيران اللي بيعرفونا واللي مش بيعرفونا بما فيها جارة من بلغاريا غاليا مش بتعرف تتكلم حتى بلغاري وقعدت انا واخويا نمثل بانتوميم وننونو ونخربش وهي تضحك فاكرانا بنضحكها وفي يوم من ذات الايام وانا رايحة المدرسة الصبح الساعة سابعة وفي شارع بيتنا الجميل المليء بقطط الشوارع المليئة بالطين والتراب وتعاني من سوء التغذية فتجد يطونها خاوية وفي وسطهم قطة ما شاء الله متختخة وجميلة بس متوسخة جدا واكتشفت انها شبه سيلفستر الخالق الناطق
نفس الشعر الجميل ونفس الجوانتي الابيض ونفس توزيع الاناقة على الجسم كله ولكن
وآه من ولكن
ولكن واقف وعليه بتاع تلاتين قطة بتغلس عليه
ولكن متوسخ جدا
ولكن
انا الصراحة شكيت انه سيلفستر لكن استبعدت الافكار السلبية دي خالص
وخلصت المدرسة بسرعة جري على البيت ودخلت لقيت اخويا في حالة من الحزن الشديد
ايه الاخبار
سلفستر هرب
طب هرب ازاي
نزل من السطوح لاسفل
من على الحيطة
نزلت جري للشارع وانا بانادي
سييلفيييستوووور
وطبعا ما نسيتش الكورة البينج يونج عشان لو حب يلعب معايا
سيلفستور سامحني
بابا رفض يا سيلفستور
وطبعا ما شفتوش تاني
وكل اللي كان مضايقني ان الست سافرت وهي عارفه انه في عيوني
وللاسف مش حاعرف اعتذر للست ام سيلفستر بس ربنا يسامحني بقى