القط الاحول

-
كان يا ما كان بيت مصري اصيل ما فيهوش قط
والبنت الصغيرة صاحبة الثمانية عشر ربيعا عايزة قط
( ايوة بنت صغيرة لاني باكتب القصة وانا عندي قرب الستين سنة عادي )
المهم ان والد تلك الفتاة الصغيرة (عادي فوتوها) مش بيحب القطط
قررت تلك الفتاة انها تجيب قطة لما اهلها يسافروا
وفعلا لما دخلت الكلية وهم كانوا في بلد وهي في بلد جابت قطة سيامي جميلة
جميلة دلوعة شقية بس
حولة
ايه يعني عشان عينيها بتبص بعيد مش حتشوف الفيران مثلا
ايوة جميلة وحولة
بس زي العسل
شقية شقاوة لا توصف
ممكن تبقى واقفة بتتدلع علي وفجأة
دريجن دريجن دريجن تجري تاخد بيت والدتي من اوله لاخره والاقيها على الستارة فوق
ليه يا بنت الحلال
مين زعلك
مفيش هي جالها مزاجها تجري وتطلع فوق الستارة
وفي النهاية ترجع تكمل لعب بعد شوية
كنت باحب اعاكسها مع العلم ان انا مش مبدأي المعاكسة
انا غالبا كنت لسة صغيرة بس
ولذلك لما عرفت انها بتحب الكريم شانتييه على عكس كل القطط اللي ممكن تعرفوها لان القطط مش بتحب الحلويات
كنت احطلها الكريمة على ام رأسها عشان تاخد وقتها على ما تجيبها من فوق وتاكلها
كنت احب جدا جدا الف رجلها باللزق السوليتيب وتقعد تنطر رجلها عشان يطلع لوحدة
مش عارفة ايه السادية اللي كنت فيها
المهم انها مكانتش تحب تقضي حاجتها في الحمام وكنا بنعمل المستحيل ونحبسها ولكن الشغالة في يوم قالتلي
القطة دي عندها امساك
ازاي يا ام امحمد
اصلها مش بتعمل بقالها سبع تيام
ازاي يا ام محمد
وانا كنت ملاحظة ان البيت ريحته متغيره
قلتلها يا ام محمد انتي مش بتنظفي البيت
قالتلي ان شاء الله يدوسني التروماي بانظفه
قلتلها يبقى هي عاملة في حتة متدارية
طبعا اكتشفت هي بتعمل فين وطلعت ام محمد مش بتنظف كويس وللاسف ما داسهاش تروماي
بس كانت مامتي على وصول وجاية من السفر وانا الصراحة زهقت من موضوع الانقلاب على الحمام وكنت عايزة ازحلقها في حنة قبل ماما ما تيجي
رحت كلمت واحدة ست جميلة صاحبتنا بتحب القطط جدا وآخر مرة لما قطتها ماتت عملت عزاء في البيت واصحابها لبسوا اسود وعزوها وانا قلت دي لقطة
يا طنط عندي حتة قطة سيامي تستاهل صالونك
ياريت يا حبيبتي هاتيهالي حالا لان من ساعة ما بسبستي ما ماتت وانا مش عارفة اعيش
من عيوني
جريت ادور على قطتي اللي كان اسمها كيارا
وحطيتها في شنطة زي فيلم الايدي الناعمة
ونزلت بيها بسرعة عشان اوديها لطنط
وانا في آخر سلمة لقيتها بتفلفص جوه الشنطة وخفت لتتخنق
فتحت حتة صغيرة قوي عشان تتنفس
وهي في ثانية لقيتها برة الشنطة بتجري في الشارع
وانا والشنطة وراها جري
كيااااارااااااااا
كيااااارااااااااا
وهي دخلت في اول محل جنب البيت
دخلت وراها
كيااارااااااااااا
المحل كله واقف يبص علي
تمالكت نفسي وعدلت هدومي وقلت لهم
بنجور
شفتم قطة سيامي كانت ماشية من هنا
كل اللي بيشتغلوا بصوا ناحية واحدة وبعدين كلهم بصولي وقالولي
لأ ما شفناش قطة
انا اقولهم
دي لسة داخلة من هنا
كلهم
لأ مفيش قطة
سكت لمدة ثلاثين ثانية احاول افهم
ليه مش عايزين يدوني القطة
وانا عارفة ان المحل ده له صاحبه عندها بنت صغيرة وتقريبا البنت عايشة في المحل مع البنات اللي بتبيع
قلت يمكن عايزين القطة تشغلها عنهم
المهم تمالكت نفسي وقلت
طنط والا البنت
البنت والا طنط
في الآخر قلت عشان ما اخسرش الجيران خليها معاهم هم احرار
كلمت طنط وقلتلها على المشكلة انها هربت مني في الشارع وطنط كمان قالتلي انا قلبي ما كانش حيستحمل قطة تانية
من يومها وكل ما ادخل المحل اشم ريحة كييااااراااا وهم مش واخدين بالهم ان الريحة دي هي السبب في الطفشان
انما بالسلامة هم الخسرانين

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد