مش لدرجة الترام ده يبقى حرام

كنت في فترة من الوقت بادور على شغالة تساعدني لاني كنت باشتغل واولادي في المدرسة وفي نفس الوقت مرهقة ولا اعلم السبب وبالتالي استعنت بصديق وطلبت من كل الناس اللي اعرفها ان يبعتولي شغالة وجاءت السيدة الفاضلة الشغالة
المنظر العام : سيدة محترمة ولكنها تضع الكثير من الكحل على العيون
الخلفية : موظفة حكومية قررت ترك الوظيفة لانها لا تدر عليها ما ستدره الاعمال المنزلية
تمت المقابلة الاولى بنجاح ولكن وآه من ولكن
اول يوم كنت في البيت وهي جاءت وبدأت في التنظيف ثم اتت ومعها بروش ثمين وهي تشخط وتنتطر
لو عايزة تعرفي اذا كنت امينة والا لأ بلاش الاختبارات دي
اهو جبتهولك اهو
طبعا انا لم اكن اعلم ان البروش ضايع مني وقد يكون وقع مني في وقت وانا مش عارفة وعشان برستيجي قدامها ما رضيتش اقول اني اتفاجئت فقلت لها
برافو عليكي انا بادور عليه لقيتيه فين
وكنت اتحدث بصدق لدرجة انها غيرت نبرة الزعيق الى نبرة المنتصر
ايوة لقيتها تحت الكنبة في الصالون
طيب هاتي الحلاوة عشان لقيته
ان آااان
بعد كدة فوجئت ان عمل سيدة من الموظفات مش حلو فهي لازم تاخد اجازة سنوية وعارضة وكانت بتتكلم على العلاوة بتاعة مايو وكل ده ملحوق ولكن لأنها موظفة كانت تشعر بان مكانها مش المطبخ
لا ابسلوتلي
مكانها قدام دولابي
وجاءت على عجل تسألني
هو انتي مش بتطلعي من هدومك ثواب
انا عايزة الطقم الازرق
هه
الازرق يا باشمهندسة
انا طبعا عارفة الطقم الازرق كنت لابساه من يومين
ولكن حبا في الله اعطيتهولها وقلت لها انا اللي باطلع اللي عايزاه مش انتي اللي تقوليلي اطلعه
اجابت بحدة
انا من الاقربون يا هانم انا يجوز علي الزكاة
اما بالنسبة لاولادي فهي كانت تتعامل معهم بكل حزم وقوة
كانت عندها بنت قد بنتي في العمر وفي نفس السنة الدراسية وكانت مش بتحب ان بنتي تزاكر كتير وبالتالي تشغلها
اما ابني لانه مش بيتكلم كتير فكانت دائمة الانتقاد له
انت بتعدي مش بتصبح علي
انت فطرت ما قلتش الحمد لله
انت فاكر نفسك مين انا ما ينفعش تتأمر علي
انت مش مستعنيني والا ايه
وتدخل حجرة ابنتي تلاقي لبس على السرير او لعب على الارض فتبدأ في الدرس
انتي عارفة الحاجات دي بكام ومنين
انتي عارفة ان فيه اولاد زي اولادي ممكن يموتوا علي الحاجات دي وما يلاقوهاش
انا لو لقيتك حاطة اللعب في الارض حاخدها
بنتي تقول لها
ليه تاخديها دي بتاعتي هو مفيش حكومة مفيش بوليس مفيش دولة
وانا لما آجي من الشغل الاقيها بتقول لي
على فكرة يا باشمهندسة ( هي لا تطلق لفظ مدام زي باقي الشغالين وكاني زميلة عمل )
الاولاد مش متربيين انا لو شفتي اولادي مربياهم احسن تربية محدش منهم يرد علي زي اولادك كدة
ابص لها واسكت
وبعدين بدأت تشعر ان انا مش الام المناسبة للاولاد وبالتالي الاقيها بعد ما جوزي ما ييجي واحنا بنتغدى وباكلمه على حاجات تخصنا انا والاولاد الاقيها جاية من المطبخ عشان تدخل في الحديث وتقول لنا
انا رايي مختلف عنكم تماما انا مش شايفة ان كدة مناسب
المهم اتخنقنا انا وجوزي منها جدا وكنا عايزين نمشيها بس مستنين غلطة جامدة عشان نعرف نقول لها مع السلامة
وفي يوم جيت من الشغل ودخلت استريح شوية ولما قمت لقيت اولادي بيتكلموا بصوت واطي وفي الاخر يقولوا بصوت عالي
يااارب
وش وش وش وش
ياااارب
قربت عشان اعرف ايه الدعاء اللي بيقولوه لقيتهم بيقولوا
يارب ما تقدر تيجي بكرة
ياااارب
يارب يضربها ترام
يااارب
طبعا من خوفي عليها لحسن دعوات الاولاد تتحقق قررت امشيها من البيت
وكانت حجتي اني عايزة واحدة تنام عشان تعمل لي العشاء وخاصة اني من ساعة ما دخلت البيت وانا في مرض دائم لدرجة اني في يوم وانا مش قادرة امشي قربت مني عشان تساعدني وقالت لي
والله يا باشمهندسة انا خايفة يكون كل اللي بيجرالك ده من عيني
آه والله زمبؤلك كدة