كله يحرص على محفظته
من عادتي ان اكون ست بيت شاطرة وان اكون زوجة ما حصلتش
وده اكيد عمل جاد ومجهد ولكن ممكن الوصول اليه ومن ضمن اللي كنت احب اعمله عدم التصادم مع جوزي
وعدم التصادم يعني التحايل
مش المحايلة
التحايل
يعني لو اتاخرت شوية في السوق لازم مستيكة من اللي بيحبها مع المشتريات عشان اقوله فاكراك
لو بيحب الارز مفيش مكرونة الا لو ما رحتش لماما على الغداء
يعني اجيب لحماتي خمسة كيلو سمك عشان افوت على اختي بالليل
ولكن كان فيه حاجة من عادتي اعملها بدون قصد او بقصد دي مش حنتكلم فيها وهي اني لما اعوز اي مبلغ لازم اطلب منه ولو على رقبتي
ابقى عايزة اجيب حاجة والمحفظة قدام عيني وهو يقول لي مش دلوقتي
مانتي عندك كتير
الدولاب مليان
الجزم حتطلع برة الشقة من كترها
وفي يوم كنا خارجين مع احد المشايخ الافاضل اللي كنت باحبهم جدا وكان من اساتذة الازهر
وسألته سؤال بريء
الا لو انا اخذت فلوس من جوزي من غير ما اقوله يبقى حرام
قال لي لأ بس بالمعروف
وفهمت اني اقدر اخد فلوس من جوزي بس بالمعروف يعني مش بالهبل يعني
جوزي روح غضبان وقعد يقول لي بقى انا باتفسح مع راجل كبارة من عظماء العلم الاسلامي تقومي تقوليلة عايزة اسرق جوزي
انا قلتله لا ابدا انا مش حاسرق عمري انا حاخد بالمعروف
وبقيت اخد فلوس من جوزي بالمعروف
وفي مرة كنا في المصيف وكان ابني كل شوية يلعب بالبسكلتة ويناديني من تحت
مامي عايز ايسكريم
حاضر افتح الدرج الاقي فلوس اديله
بنتي
مامي عايزة بالونات
مامي عايز وعايزة وانا لاقية الدرج موجود والفلوس كتير والحمد لله ومحدش بيتكلم
وبعد يومين جاء الراجل اللي بيركب الغسالة الجديدة وفتح جوزي الدرج
وقال له عد فلوسك يا عم
قاله ناقصة
اخذهم جوزي والمهم ان محدش دخل البيت غيرنا عشان جوزي يشك فيه
راح مكمل من جيبه ونزل الراجل ولقيت جوزي بيبص لي
قلتله انا ماعرفش انك حتعمل جرد النهاردة كنت ولعت فيه
تعليقات
إرسال تعليق