من اهم علامات الذكاء !!!! الدهولة
من زمااان وانا مش مركزة
كنت باعتبرها من علامات الذكاء ....... ولازلت
اروح المدرسة ناسية نص الادوات
اروح الامتحان من غير المقلمة
افتح الثلاجة ومش عارفة انا فتحتها ليه
الاهم ان ممكن وانا سايقة مروحة البيت اعدي البيت واتجه الى نهاية كورنيش اسكندرية ولما افوق قرب المنتزة ارجع واكتشف اني اخذت الكورنيش في الاتجاه التاني لآخره وفي الآخر عشان اروح افضل وبصوت عالي اكلم نفسي في العربية
انا مروحة البيت
انا مروحة البيت
عادي ومتعايشة
وفي يوم واحدة صاحبتي عايشة في امريكا قالتلي جيبي بوست ات post it وهو ورق بيلزق وملون تكتب فيه وتلزقه على اي حاجة واكتبي فيه كل اللي عايزة تفتكريه وقلت والله فكرة
كتبت على الورقة
تصوير البطاقة والرخصة
وقلت عشان لما يضيعوا اعرف اطلع بدل فاقد
وتاني يوم صحيت من النوم ورحت الشغل
قابلت اول زميلة لي
صباح الخير وبوسة من هنا ومن هنا
لقيتها بتقول لي
آه ده انا عايزة اصور البطاقة والرخصة
استغربت جدا قلت ايش عرفها ان انا فكرت في الموضوع ده قبلها بيوم
بعديها بخطوتين شفت زميلي
صباح الفل وبعديها على طول آه ده انا عايز اصور البطاقة والرخصة
ولما تكرر الموقف سألت اللي بيقول كدة
اشمعنا النهاردة اللي افتكرت الموضوع ده
قال لي
عشان انتي كاتباها على الشنطة
بصيت لقيتني ملزقة الورقة البوست ات الصفراء المزهزهة على الشنطة من برة وماشية بيها عاملة اعلان
يالا اهي دي ضريبة العبقرية
تعليقات
إرسال تعليق