خليك دايما تحت جناح ربنا

النهاردة عايزة اتكلم على سيدنا ابراهيم
شاب قعد يفلسف عقيدة اهله اللي كانوا بيعبدوا اصنام وبيربطوها بنجوم وكوكب في السماء ولما قعد يبص في السماء ويشوف الكواكب والنجوم وهي صغيرة قصاد القمر احتقرها ولما الشمس طلعت والقمر اختفى احتقر القمر ولما الشمس اختفت بالليل قالك مش ممكن اعبد اي حاجة من دول لانهم مش ثوابت وكل كبير منهم له الاكبر منه
هذا الشاب بعقله وصل الى الله ووقف امام شعب وامة وعقيدة بالكامل
اترمى في النار وطلع منها
ساب البلد وقعد سنوات مش بيخلف ولما خلف ولد بعد شوقة ربنا طلب منه يسيب مراته وابنه البكر في الصحراء ولا فيش موبايل يطمن عليه وكانت زي ما يكون ربنا بياخد منه اغلى ما عنده ومش بس بياخدهم لا ده سايبهم بلا حول ولا قوة في نصف الصحراء
ولما كبر ربنا طلب منه يذبحه وعلى فكرة اهل العراق في هذا الزمن دي كانت طقوس بيعملوها انه تقربا لالهته يذبج الابن البكر ولكن هو مكانش على عقيدتهم ولكن لما ربنا طلب منه كان اختبار كبير قوي
اللي عايزة اوصل له
ربنا سماه ابونا
يعني اي واحد مسلم ابوه ابراهيم
هه
ايه الاخبار
فين النار اللي حتتحطوا فيها بقى
احنا خلال حياتنا اللي يختار انه يكون له طريق صح يمشي فيه لازم بعرف انه في يوم من الايام حيترمي في نار ولازم يعرف ان اللي بيخليها بردا وسلاما هو ربنا
في خلال حياتنا اللي يختار ان يكون له هدف ورسالة في الحياة ممكن يلاقي نفسه بيتخلى عن اجمل واحسن وافضل ما يمتلك ولكن اللي بيطلع مياه من وسط الصحراء هو ربنا
احنا خلال حياتنا حنقابل الشيطان الاصغر والمتوسط والاكبر وحنرجمه لكن اللي حيحمينا منه هو ربنا
خليك دايما تحت جناح ربنا علشان انت مش حتقدر على النار والصحراء لوحدك واعرف انهم كلهم الكام سنة اللي عايشينها مش اكتر وفي الاخر ما احلى الرجوع اليه