عمر الستات من سابع المستحيلات

-
مش عارفة ليه الستات مش بتحب حد يعرف عمرها
يعني لو انا عندي خمسين وشكلي يدي على عشرين تفتكروا الناس لو قالت عندي ثلاثين ازعل
او لو عندي ثلاثين وشكلي يدي على ستين وواحد قال لي انتي عندك خمسين ازعل
انا مش حازعل
بس الستات كلها بتزعل
انا باقول عندي كام سنة وبشجاعة ولذلك كان الستات ما تحبش تقعد جنبي في اي قاعدة لان الموضوع ممكن يتفقش
وانا في الثلاثين كنت باقول اني في الثلاثين وكنت بالبس غويشة (الله يرحمها اتسرقت مع الدهب اللي اتسرق كله ) كان فيها في كل سنة من عمري قطعة مكتوب عليها السنة واستمرت الى ان انتهت الحلقات ولم ينتهي عمري
البريد الخاص بي في اخره 1955 وهو سنة الميلاد
وكان في الزمن الماضي قبل ما البنت تدخل الكليات وتتخرج وتقدم شهادة الميلاد من مصوغات التعيين وتطلع على المعاش كانت الستات في الزمن الجميل تقعد مستتة لغاية لما ييجي العريس ودايما يكون الحد الفاصل هي عندها كام سنة وهي اكبر والا اختها اكبر لان زمان كان الاخت الكبيرة تتجوز الاول وحاجات من هذا القبيل
اتعودت على ان سن الست من المواضيع الشائكة ولذلك نصحتني والدتي ان لما حد من اولادي يسألني عندك كام سنة لازم تقولي سن صغير لان حيمسكوا عليكي الكلمة وتفضلي طول عمرك مش عارفة تخبي سنك
ولاني بنت محترمة ولاني باسمع كلام والدتي فلما جاء اليوم الفاصل اللي منتظراه كل ست وقفت بنتي قدامي وبالحركة البطيئة والصوت البطيء  ماما انتي عندك كام سنة
ترددت كثيرا
انا عندي 36 سنة اقولها كام يعني
ثلاثين يبقى مسش فارقة
رحت مصغرة بتاع عشر سنين وقلتلها
عندي ستة وعسشرين سنة يا حبيبتي
اتخضت جامد
 معقولة بجد
انتي اكبر من مامتك
قلتلها ليه هي مامتي عندها كام سنة
قالتلي جدتي قالتلي عندها 18 سنة


تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد