اتجوز آه اتطلق لا
بنت واحدة قريبتي كان عندها خمس سنوات في اولى ابتدائي وكانت ساعات تسيبها عندنا لظروف سفر او غيره وكانت زي العسل احب اسمع تعليقاتها
مثلا
قالتلي مرة يا بختيييييك بحرقة قوي
قلتلها ليه
قالتلي عشان عندك اوضة لوحدك لان انا مش حيبقى عندي اوضة لوحدي لان انا مع اخويا دلوقتي وبعدين حاتجوز حابقى مع جوزي
مرة تانية قالتلي نفسي يبقى عندي كلب بس خايفة جوزي يرفض
مرة تانية سمعت مامتها بتقول لمامتي
مش فلانة اتجوزت
قالتلهم
لا ما ينفعش تتجوز على طول لازم الاول
قراية فاتحة
خطوبة
كتب كتاب
جواز
اولاد
وبعدين تتطلق
وكان اخوها دايما يحب يعاكسها ويضغط على صوابع ايديها وهي تعيط وفي مرة من زعلي منه قررت اعمله زي ما هو بيعملها
رحت ماسكة صوابعه وضغطت عليها قام عيط
قعدت تزعق لي وتقول لي
ليه تعملي كدة
قلتلها عشان يبطل يعمل لك كدة
قالتلي
اخويا وهو حر في انتي ايه دخلك
في مقابل ولد تاني قريبنا برضه كنت اقعد معاه واحاول انكشه عشان يتكلم يقعد ساكت وفي الآخر اقول له ممكن تقلد لي صوت البقرة
يقول لي البقرة بتقول موووو وبتعيش في اوضة
اقول له طيب والحصان
يقول لي الحصان بيقول ههيييييي وبيعيش في اوضة
والوزة
بتقول كاك وبتعيش في اوضة
كان عنده كل الناس والحيوانات تعيش في اوضة بس ما استفسرتش انهي اوضة
كان هوايتي الجلوس مع الاطفال رغم نصبحة والدتي لي اني احاول ان اجالس الكبار عشان اعرف اتجوز لان كدة حيقولوا علي هايفة
المهم من كتر ما كنت باحب الاولاد واقعد معاهم كنت ممكن في مرة اقعد مع الكبار الاقي واحد جاي يشدني من هدومي ويسألني
ايه اللي مقعدك مع الكبار يا طنط
تعليقات
إرسال تعليق