انا ما اتسرقش ابدا

كالعادة اي واحد لازم يكون حريص
يعني ما ينفعش ينسى المفتاح
والا المحفظة
والا الفلوس
والا الرخصة
ولكن صاحبتكم حريصة انها تنسى كل حاجة
تنسى المقلمة وهي رايحة الكلية
وتنسى المفتاح وهي رايحة البيت
وتنسى كارنيه النادي وهي رايحة النادي
وتنسى الفلوس في البيت
وطبعا مع وجود شغالة في البيت على الرغم من انها بقالها سنين الا ان والدتي دايما تحذرني
حرص ولا تخون
وانا حريصة اني انسى ومش باخون يعني مش بطالة لأي شغالة
وبعد عدة اشهر لقيت الفلوس بتنقص ومصروف البيت بيقل بطريقة غير منطقية
مامتي كانت مسافرة وسايبالي الموضوع ومعايا اخويا الكبير ولكن برضه سايبلي الموضوع تقولوش ان انا جمال عبد الناصر في عز ايامه
لما قلت لمامتي وبعتلها في جواب وده على ايامنا كان بحقيقي تكتب ورق وتحط في ظرف وتقفل الظرف وتلزق طابع بوستة وترميه في صندوق البريد عادي وتعيش بعديها عادي تاكل وتششرب مش فيلم ابيض في اسود
واستنيت الرد بجواب
كلمتين حلوين على اني وحشتهم
كلمتين جامدين على اني باضيع المصروف
نصيحة اقفلي بالمفتاح
وما كدبتش خبر هاتي مفاتيح كل شيء الدولاب والدرج وكله يتقفل وكله يتحط في سلسلة مفاتيح زي بتاعة الحرامية
والبسي وانزلي للكلية
وانا في نصف السلم اسمع الشغالة
ست كوكا
نعم يا ام محمد
المفاتيح
هه
يا خسارة تعبي يعني بعد ده كله كان ممكن اسيبلها كل المفاتيح تعمل بيها اللي هي عايزاه
تاني يوم وانا رايحة الكلية
ست كوكا
الشنطة
اللي فيها المفاتيح طبعا
اليوم اللي وراه
ست كوكا
قلتلها المفاتيح معايا
قالتلي لا ما تنسيش تجيبي طماطم معاكي
المهم ان كل ما احب اجيب اي حاجة من اي حاجة في البيت امسك سلسلة المفاتيح اللي فيها بتاع خماشر مفتاح ودوري على المفتاح اللي يفتح
في الآخر حطيت كل مصروف البيت في سكرتيرة وبقى معايا مفتاح واحد بس
ولكن الحمد لله ام محمد طلعت مالهاش دعوة بالمفاتيح هي بتزق الدرفة بتاعة السكرتيرة لجوة قوم السكرتيرة تتفتح وفضل المصروف برضه مش بيقضي حتى وانا معايا مفتاح