الفول ليلة العيد بس

-
كنت في سلطنة عمان وكنا في رمضان وجوزي بيحب يتسحر فول ولان هناك مكانش فيه فول فانا مش عارفة اعمله ازاي
ولما جبت الفول ولقيته ما لقيتش الدماسة
ولما قررت اني اعمله في حلة على نار هادية كنا ليلة العيد
واكتشفت ان الاولاد ما اشتريناش لهم لبس للعيد
وقررنا ننزل نشتري للاولاد اللبس
في عمان مش زي مصر
المسافات تبدأ من 50 كيلو وطالع
انا من اسكندرية يعني الكورنيش 23 كيلو
انما اضطرينا ناخد السكة الطويلة عشان نروح نشتري لبس حلو واول ما وصلنا للمول قلت لجوزي
اوبااااااا
انا نسيت الفول على النار
قال لي الدماسة
قلت له لا الحلة
سألني
فيها مية كتير
لأ
النار واطية
لأ
اشمعنى النهاردة والعيد بكرة وجرينا نروح على البيت بسرعة 120 كيلو
وطول السكة يقول لي جوزي
انا طلبته في رمضان ، تقومي تعمليه في ليلة العيد
الله مش لما حليت المشاكل المحيطة بعمل الفول في البيت
المهم احنا كنا في كومباوند الجامعة وكله شوارع بارقام 1 2 3 4 5 وهكذا
والميادين أ ب ج
محسسني انهم في معادلات رياضية يعني احنا شارع خمسة دوار أ والحل فيلا خمسة على الشمال
وصلنا لأول الشارع ولقينا كمية عربيات كتيرة واقفة
جوزي قال لي الظاهر المطافي
الدخان يمكن طلع والناس جت تطفي النار
ورحنا بسرعة وبحركة سينيمائية امريكية فذة وقفنا في وسط العربيات
وفتحنا الابواب بسرعة وكنا في الشارع في ثانية
وبنبص حوالينا لقينا ان احنا مش قدام البيت وان العربيات دي في فيلا تانية خالص
واحد عامل حفلة وعازم اصحابه
احنا من سكات بصينا على الناس ورجعنا على العربية
بنفس السرعة مارشاريير
ودخلنا في الفيلا اللي جنبها اللي هي بتاعتنا ومفيش حد قدامها
ورحنا فتحنا الباب
البيت مليان دخان وريحته هباب
اخذنا بعضنا وفتحنا كل الشبابيك ورحنا لأصحابنا لغاية لما نقدر ندخل ننام
فترة الاعارة كانت 5 سنوات
ريحة الحريق بتاع الفول فضلت في البيت لغاية لما سلمناه للجامعة
ومن ساعتها بطل جوزي يطلب فول
وقرر يجرب البليلة 

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد