باقولك ايه .... انا عايزة اعيش

-
جبت حوض سمك لأولادي عشان اعلمهم يتحملوا المسئولية واشتريت اصناف من السمك منه زينة ومنه زينة برضه ومنه سمك خدمي زي الكات فيش وهي سمكة تنظف ارضية الحوض والجي ايتر وهي سمكة تاكل الطحالب والفطريات وسمك شبه القرش وتاني ملون جوبي بديل طويل وكل يوم ابص على الحوض وانا فخورة بالشكل الجميل للسمك وبعدين في يوم من تلكموا الايام
آن آنننننن ن ن
السمك نقص واحدة
ادور عليها يمين شمال ابص من الاتجاهات الخمسة تسألوني اللي هم انهي اقولكم الجوانب الأربعة والسقف ولا من شاف ولا من دري
قعدت زعلانة على البنية اللي اتخطفت
يا ولاد محدش شافها
ابني بص لي بتمعن
ماتت والسمك الكبير بياكل السمك الصغير مش حضرتك دايما تقوليلنا ان فيه ناس زي السمك بياكل بعضه
صحيح ممكن تكون اتكلت
سبت الحوض وانا متضررة
تاني يوم الموسيقى التصويرية كانت اقوى حبتين لان لقيت سمكة تانية اختفت
الله
هم مش عاملينلي حساب والا ايه
فين اختكم يا ولاد
اشيل اللعب اللي تحت وابص في كل مكان مالاقيش حتى الشوك بتاعها
هو فعلا السمك شكله بياكل بعضه بس هي مش غابة يعني كل واحد عمال ياكل في التاني
وثالث يوم صحيت من النوم عشان الاولاد يلبسوا ويروحوا المدرسة لكن كلا البتة
رحت جري على الحوض والاولاد سمعوا
لااااااااااا انتم اتجنيتوا والا ايه
الاولاد صحيوا علي وانا بازعق للسمك
هو انا شارياه عشان تاكلوه
انا باحطلكم اكل كل يوم يا مفاجيع
بدأت بعديها اشك في سمك القرش الصغير
واصحى من النوم في نص الليل عشان امسكه متلبس
محصلش
الله
وفي يوم رمادي ما طلعتلوش شمس
واحدة من سمك القرش اختفت
براااءة
الله
شكيت في السمكة الشغالة اللي عمالة تكنس الحوض
اتاكلت
اللي بيلمع الزجاج
اتاكلت
قلت ما بدهاش انا لازم اعرف اللي اكلت كل السمك ده فين
رحت للخبير اللي اشتريته منه
قال لي يمكن بينط برة الحوض
تاني يوم جوزي صحي لقاني بادور ورا السفرة وتحت البوفيه لان سمك القرش كله خلص وعدد السمك اصبح قليل وبقينا كلنا مستغربين جدا ورحت تاني لاستشارة
قال لي السمك لما بيتعب ويدروخ السمك التاني بياكله فاول ما تلاقي سمكة مدروخة شيليها في مكان تاني مؤقتا لغاية لما تخف حطيها
عايزة اقولكم اني كنت عازمة ناس على الغذاء  والشغالة عماله تحضر المشمر والمحمر وانا عين على الضيوف وعين على الحوض لغاية لما لقيت سمكة مدروخة حبتين استأذنت الناس ورحت جبت الشبكة والناس بتبص لي ومش فاهمة  وعشان اسرع العملية جبت اول اناء في سكتي وكان الظاهر شفشق بلاستيك والا علبة بلاستيك ملونة المهم ان السمكة جوه مش باينة وحطيته بسرعة في المطبخ ورجعت مع اصدقائي وصديقاتي فل الفل
شوية ولقيت بنتي بتصرخ
حرااام لا حرااااام
فيه ايه جريت على المطبخ لقيت الشغالة حاطة مصفاة على العلبة البلاستيك بتصفي ماء الباذنجان قبل ما تقليه
يا نهار ازرق وملون بالوان الطيف
السمكة طبعا مش حاقولكم
اتقضى عليها بضربة معلم وبنتي ماسكة في خناق الشغالة وهاتك
حرام علييييكيييي هي كانت عملت فيكي ايييييه
والشغالة بتبص لي عشان الحقها لان حكاية ان سمكة ماتت ما تاكلش معاها لان الغذاء قبلها بيوم كان سمك يعني كله مات قبل ما ناكله مش قصة يعني ان سمكة فسفوسة قد الزيتونة تموت
خلصنا يومها وبدأت الاحظ شيء غريب جدا
فيه سمكة تضاعف حجمها
الذكر بقى قد الانثى بتاع اربع خمس مرات
انت بتكبر كدة ليه يا عم
تكونش انت اللي بتاكل عيالي كلهم
سألت الخبير
قال لي
ايوة ممكن فيه سمكن بيجيله حالة من التوحش وياكل السمك التاني
والحل يا سعادة الباشا
انك تحط السمكة لوحدها خالص لمدة وبعدين ترجعها
المهم ان السمكة دي من الاول جبتها عشان صعبت علي لان مفيهاش اي جاذبية ومش ممكن حد غيري يشتريها لانها شبة البلطي في الشكل واللون الترابي الفضي الغريب
مسكت السمكة بالشبكة وحطيتها لوحدها شوية
يوم كدة ورجعتها
وتاني يوم لقيتها ماتت
الله طب دي ماتت من غير ما عرف سر اختفاء السمك
ماتت ومعاها سر الاسماك
قبل ما تختفي واحدة تانية اخذت السمك كله في كيس واعطيته للخبير وقلت  له
باقولك ايه
انا عايزة اعيش



تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد